Analisti Skënder Minxhozi komentoi në emisionin “Real Story” të gazetarit Sokol Balla, në News24, zgjedhjet parlamentare në Kosovë.

Minxhozi vlerësoi zgjedhjet në Kosovë, duke thënë se dhanë një leksion të madhe demokracie për të gjithë shqiptarët, por edhe për vendet e Ballkanit.

Sipas tij, ndonëse kanë vetëm 13 vite shtet, kosovarët arrijnë të ndërrojnë elitat politike, gjë që nuk ndodh në 30 vite në Shqipëri.

“Ajo që ka ndodhur sot në Kosovë ka një rëndësi të dyfishtë për vetë Kosovën së pari dhe për gjithë botën shqiptare. Është diçka që do ta vija edhe mbi fitoren e Albin Kurtit, një ushtrim i papërsëritur i demokracisë së drejtpërdrejtë, që është vota e popullit. Na jep një leksion të gjithë ne shqiptarëve kudo jemi të habitshëm dhe të papritur, por të bukur, që është demokracia. Vini re se çfarë ndodh në mes të dimrit, ku qeveria humbi pa asnjë lloj drame e fataliteti, siç ndodh te ne. Kosova në ndryshim nga Shqipëria, në mes të dimrit të acartë, pa asnjë dramë, rrëzon parlamentin dhe shkon në zgjedhje krejt të natyrshme. Kjo është një rregullsi procedurale, demokratike, që në Kosovë përjetohet me lirshmëri, qetësi. Kosova jep një mësim të madh demokracie për të gjithë vendet e Ballkanit, sepse voton kur duhet ose kur gjykon se duhet votuar, nuk bën shtyrje artificiale për votë. Le t’i shajmë sa të duam e le të na duket vetja të bukur ne këtu në Tiranë, në shtetin 100 e ca vite.

Atje humbësit dalin humbës, pranojnë humbjen, fillojnë edhe dorëheqjen, votat numërohen absolutisht normal dhe një ditë pas zgjedhjeve ne dimë rezultatet. Kjo tejkalon fitoret spektakolare. Këto janë meritë e sistemit dhe e atij që quhet rëndom popull. Të bësh një lojë të tillë duhet të kesh një klasë politike të përgjegjshme dhe një popull, që kanë ardhur në mes të pandemisë gjithë mërgata, me teste Covid-i në duar, dhe kanë votuar. Sot në Kosovë dukej që kishte frymë. Është një përjetim kaq i bukur dhe kaq për t’u idealizuar. Është një mjedis ku ti e di se vota jote do të lexohet për 24 orë, s’do mbahet peng as nga KQZ, as nga asnjë.

Ne edhe zgjedhjet vendore me një parti, mezi e nxorëm rezultatin. Është një meritë e madhe e popullit të Kosovës kësaj radhe për fitoren e Albin Kurtit. Me 13 vite shtet, kosovarët arrijnë të ndërrojnë elitat politike, që ne në 30 vite shtet dhe duke u ngrefosur këtu në Tiranë, kemi pasur djegie të elitave të reja që tentonin të dilnin”, u shpreh Minxhozi.

 

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb