Më në fund tifozët e futbollit të bukur kishin mundësi të shinin në aksion një nga tredhëmbëshit më të famshëm dhe më shpërthyes të ndërtuar së fundmi, Messi-Neymar-Mbappe. Debutimi i tyre në Champions pritej me interes të madh pasi “kupa me veshë të mëdhenj” është objektivi kryesor i PSG këtë sezon. Club Brugge ishte rivali ideal në letër për të dhuruar show por belgët i rezervuan një surprizë të hidhur duke u ndalur në një barazim 1-1 që shumë pak veta e imagjinonin. Ander Herrera krijojë iluzionin se gjithçka po shkonte sipas parashikimeve teksa kaloi francezët në avantazh në minutën e 15-të.
Djemtë e Pochettino kishte mundësi të dyfishonin shifrat me Mbappe por “gjeli” më i famshëm ishte thjeshtë i pafat. Në të 27-të, belgët barazuan shifrat duke e kthyer në malore këtë transfertë për PSG. Messi nuk mundi të bëjë diferencën, nuk arriti të krijojnë një rast të pastër ndërsa Pochettino u detyrua të bënte pa Mbappe me fillimin e pjesës së dytë me sulmuesin që pësoi një dëmtim. Rezultati mbeti i pandryshuar deri në fund me PSG që largohet me kokën poshtë dhe më shumë pikëpyetje.
Trajneri Pochettino theksoi pas ndeshjes se Mbappe ka pësuar një dëmtim në kavilje ndërsa u shpreh i kënaqur me paraqitjen e bërë nga Leo Messi. Grupi A ku bën pjesë PSG, kryesohet nga Man.City me “qytetarët” që shpartalluan Leipzig me rezultatin 6-3.
(BalkanWeb)