Zjarret që shpërthyen në pyjet e Algjerisë lindore kanë vrarë të paktën 37 persona dhe kanë plagosur 161 të tjerë, tha departamenti i mbrojtjes civile.

Shumica e viktimave u raportuan në Wilaya, ose rajonin, El Tarf, pranë kufirit verior Algjeri-Tunizi, ku u gjetën të vdekur 34 persona. Numri i të vdekurve përfshinte një familje prej pesë anëtarësh të gjetur në shtëpinë e tyre dhe tetë persona në një autobus publik ndërsa udhëtonin në një rajon malor.

“Shumica e viktimave në El Tarf janë pushues që erdhën për të shijuar plazhet parajsore dhe peizazhet magjepsëse,” tha kryeministri Aïmene Benabderrahmane.

Ai dhe disa anëtarë të qeverisë mbërritën në El Tarf të enjten. Kryeministri tha se shteti algjerian do të mbështesë familjet e viktimave dhe do të paguajë për punën e rinovimit dhe kompensimin për humbjen e bagëtive dhe koshereve të bletëve. Rajoni është i njohur edhe për industrinë e tij bujqësore.

Një person vdiq në Souk Ahras, në jug të El Tarf. Dy persona të tjerë vdiqën në rajonin e Setif, rreth 300 kilometra (185 milje) në lindje të Algjerit, kryeqyteti i vendit të Afrikës Veriore.

Zjarrfikësit nga rajone të tjera u vendosën për të ndihmuar në luftimin e zjarreve, tha agjencia e mbrojtjes civile.

Thirrjet për solidaritet u postuan në rrjetet sociale së bashku me thirrjet për ndihmë. “Ne kemi nevojë për gjithçka,” tha Yacine Bensalem, nënkryetare e një asambleje rajonale.

Linjat e kamionëve që sillnin ushqim , ujë, batanije dhe rroba mund të shiheshin duke u nisur drejt El Tarf. Një njësi krizash u krijua për të mbikëqyrur donacionet, tha Bensalem.

Ministri i Brendshëm algjerian Kamel Beldjoud tha se 39 zjarre shpërthyen në 14 rajone vetëm të mërkurën dhe se flakët kanë shkatërruar 3200 hektarë (mbi 12 milje katrorë) pyje që nga fillimi i gushtit.

Autoritetet thanë se u krijua një komitet për të hetuar shkaqet e zjarreve.

Në një mesazh ngushëllimi dha presidenti Abdelmadjid Tebboune i cili shprehu solidaritetin me viktimat. Ai tha se shteti algjerian do të përdorë “të gjitha burimet njerëzore dhe materiale” për të luftuar zjarret dhe se familjet e njerëzve që vdiqën ose shtëpitë e të cilëve u prekën do të “marrin kompensim”.

Zjarret e mëdha në Algjeri vitin e kaluar vranë 104 njerëz, përfshirë 33 ushtarë. Në mesin e qershorit, autoritetet algjeriane morën me qira një avion zjarrfikës nga Rusia për tre muaj.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb