Të paktën 14 persona u vranë dhe rreth 40 të tjerë u plagosën pasi një zjarr përfshiu një klub nate në provincën Chonburi në juglindje të Tajlandës.

Zjarri shpërtheu në orën 01:00 me orën lokale të së premtes në rrethin Sattahip, tha policia.

Pamjet tregojnë njerëz që bërtasin ndërsa ikin, disa me rroba në zjarr.

Shkaku i zjarrit nuk është i qartë, ndërsa ekipet e shpëtimit thonë se materialet e ndezshme në mure mund ta kenë përkeqësuar atë.

Vendi në Chonburi, një provincë e vendosur 150 km (90 milje) në jug të Bangkok-ut, ishte një kompleks njëkatësh me përmasa 4,800 metra katrorë (51,660 këmbë katrore).

Zjarrfikësit luftuan për më shumë se dy orë për të vënë nën kontroll zjarrin, raportojnë mediat lokale. Zjarri me sa duket shpërtheu gjatë një shfaqjeje me muzikë live në vend, sipas nënës së një prej interpretuesve të muzikës që vdiq në incident.

Trupat e viktimave u gjetën kryesisht pranë hyrjes dhe në banjo. Të tjerë u gjetën pranë kabinës së DJ-ve.

Deri më tani, të gjithë ata që vdiqën besohet të jenë shtetas Thai.

Kryeministri i Tajlandës Prayuth Chan-ocha të premten urdhëroi një hetim mbi zjarrin dhe tha se familjet e viktimave do të merrnin ndihmë nga autoritetet. Ai gjithashtu u bëri thirrje vendeve argëtuese në mbarë vendin që të sigurojnë që të kenë daljet e duhura emergjente dhe masat e sigurisë.

Zyrtarët thanë se vendi ishte kthyer nga një restorant në një klub nate dhe ka të ngjarë të funksiononte pa leje.

Kjo nuk është hera e parë që një zjarr vdekjeprurës shpërthen në një klub nate në Tajlandë.

Në vitin 2009, më shumë se 60 njerëz vdiqën në Bangkok pasi një zjarr u përhap në klubin Santika në orët e para të ditës së Vitit të Ri. Dy burra, përfshirë pronarin e klubit, u burgosën në vitin 2011.

Dhe një zjarr në një klub nate në destinacionin turistik të njohur Thai të Phuket në vitin 2012 vrau katër persona dhe plagosi shumë të tjerë.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb