Temperaturat e larta të ditëve të fundit kanë rritur ndjeshëm numrin e vatrave të zjarrit në bashkinë Durrës.

Gazetarja Klodiana Haxhiraj ka raportuar për BalkanWeb, se së fundmi një vatër zjarri është regjistruar edhe në varreza, ku është dashur ndërhyrja e zjarrfikësve për të vënë situatën nën kontroll dhe fikur flakët.

E ndërsa situata është normalizuar, Ndërmarrja e Shërbimit Komunal ka një apel për të gjithë qytetarët, për të evituar raste të ngjashme në të ardhmen.

“Mos ndizni qirinj, sepse bëhen shkak për vatra zjarri!”, është apeli drejtuar qytetarëve.

Siç duket edhe në pamjet filmike, zjarri ka shkrumbuar një pjesë të bimësisë rreth varreve dhe ka rrezikuar të përhapet edhe më gjerë.

Ndërkohë zjarret vijojnë edhe në fshatin Shetaj. Në komunën Bizë zjarri është vënë nën kontroll, por është duke vijuar puna për shuarjen e plotë të flakëve.

(BalkanWeb)