TIRANË-Gjykata e Tiranës ka dënuar sot me 5 vite burg shtetasen Uarda Çota. Kjo e fundit aksidentoi për vdekje djalin e Avenir Pekës. Prokuroria kërkoi 8 vite burg për 29-vjeçaren.
NGJARJA
Ngjarja u shënua ne daten 29.12.2014 rreth orës 20:20 në zonën e Kopshtit Botanik në kryeqytet. Rubin Peka, 11 vjeç, ka mbetur i vdekur pasi makina me të cilën udhëtonte bashkë me nënën e tij u godit nga pas me forcë të madhe nga një mjet tjetër me targa angleze. Enkelejda Peka, bashkëshortja e ish¬zv.ministrit Avenir Peka, ka qenë duke drejtuar makinën tip ”Chrysler” me targë AA 200 AR. Ajo kishte edhe dy djemtë në makinë, Rubin 11 vjeç dhe djalin tjetër I. Peka, 8 vjeç. Bashkë me ta, drejtuesja e mjetit kishte marrë me vete edhe nipin e saj, 11 vjeç, A. Bylykbashi. Gjatë lëvizjes në rrugë, në një pjesë të aksit ku po bëhen punime, mjeti tip “Chrysler” është goditur nga pas në mënyrë të papritur nga makina tip “Benz” me targë angleze EN07XNR. Si pasojë e përplasjes së fortë, të dyja makinat kanë dalë nga rruga dhe kanë rënë në një gropë të madhe të gjerë në anë të aksit ku ndodhi aksidenti. Makina ku ndodheshin viktima dhe të plagosurit ka rënë poshtë në tabanin e gropës, ndërsa Benzi ka mbetur pjerrët në njërën anë të saj ngjitur pas makinës ”Chrysler”. Pas sinjalit të marrë në lidhje me aksidentin, forca të shumta të policisë kanë shkuar në vendin e ngjarjes. Menjëherë janë nisur drejt spitalit për ndihmë mjekësore të gjithë personat e plagosur.
Drejtuesja e makinës ”Chrysler”, shtetasja Enkelejda Peka, së bashku me djalin 8-vjeçar dhe nipin e saj (djali i vëllait) janë dërguar për ndihmë mjekësore në spitalin e traumës, ku mësohet se janë jashtë rrezikut për jetën. Ndërkohë në vendin e ngjarjes është mësuar se shtetasi Rubin Peka, 11 vjeç, kishte humbur jetën. Policia filloi menjëherë hetimet në lidhje me aksidentin e rëndë duke ndaluar drejtuesen e makinës tip “Benz” me targa angleze. Shtetasja Uarda Çota, 29 vjeçe, ka rënë në prangat e policisë me akuzën e “shkeljes së rregullave të qarkullimit rrugor”.
Sipas hetimeve të Policisë, shkak i aksidentit ka qenë shpejtësia tepër e lartë me të cilën lëvizte automjeti i drejtuar nga 29¬ vjeçarja. Pas hetimeve të para, ajo është arrestuar para mesnatës së djeshme në kryeqytet pasi rezultoi se po drejtonte automjetin në gjendje të dehur. Në makinën tip “Benz” që mendohet se shkaktoi aksidentin, ndodhej edhe një vajzë tjetër bashkë me drejtuesen e mjetit, e cila ka marrë lëndime të lehta për shkak të aksidentit. Lidhur me aksidentin e rëndë, mësohet se ka nisur edhe një procedim penal ndaj firmës “Salillari”, që kryente punimet në rrugë, për moszbatim të rregullave të sigurisë në punë dhe mospajisjen e kantierit të ndërtimit me barriera mbrojtëse.
(a.n/BalkanWeb)
