Autoritetet belge kanë bërë një rezyme të asaj që ka ndodhur me operacionet e zhvilluara në bazë të përgjimeve nga SkyECC, kur kanë kaluar pothuajse pesë vjet që kur nisi operacioni më i madh policor ndonjëherë në Belgjikë.
Mes statistikave një “vend nderi” zënë edhe shqiptarët, ku autoritetet bëjnë me dije se 1 e treta e mesazheve të shkëmbyera në SkyECC ishin në gjuhën shqipe.
“Kartelet e drogës nga Ballkani në veçanti duket se kanë fituar terren në Belgjikë. Për shembull, një e treta e mesazheve të koduara ishin në shqip, gjuha amtare e 578 të dyshuarve. Kjo është arsyeja pse Belgjika po punon ngushtë me zyrën e prokurorit publik shqiptar në rastet e Sky ECC. Të dhënat e Sky ECC belge kanë ndihmuar tashmë në zgjidhjen e pesëmbëdhjetë vrasjeve dhe pesëmbëdhjetë tentativave për vrasje në Shqipëri. Belgjika gjithashtu ndau të dhënat e saj me Kosovën, Malin e Zi dhe Maqedoninë e Veriut”, thuhet në raportim.
Hetimi tregoi gjithashtu se transfertat e drogës në Belgjikë dhe Amerikën e Jugut kontrolloheshin nga një ose më shumë pajisje nga vende të largëta si Emiratet e Bashkuara Arabe, Turqia, Maroku, Shqipëria ose vende të tjera të Ballkanit. Kjo u lejonte krerëve të bandave të drogës të kontrollonin dërgesat e drogës nga një distancë e sigurt, pa rënë në kontakt me drogën.
Bëhet me dije se në total, më shumë se 1,200 persona janë dënuar tashmë për raste që u iniciuan pas sulmit kibernetik ndaj shërbimit të mesazheve të koduara Sky ECC. Ata u dënuan kryesisht në raste droge, por edhe për dhunë, pastrim parash, shkelje të sekretit profesional dhe vepra penale me armë.
Më shumë se një miliard mesazhe u përdorën në hetimet gjyqësore. Kjo çoi në arrestimin e shumë kriminelëve, por edhe të figurave publike.
Pas pesë vitesh hetimesh, u hapën 470 raste kundër kriminelëve që përdorën shërbimin e mesazheve të koduara. Analiza e mesazheve identifikoi gjithashtu gati 5,000 të dyshuar të mundshëm. Më shumë se 200 raste në vazhdim u pasuruan gjithashtu me informacion nga mesazhet e Sky ECC. Për më tepër, policia dhe zyra e prokurorit publik sekuestruan gjithashtu më shumë se 224 milionë euro dhe dhanë dënime me 3,684 vjet burg.
Rrjeti i gjerë ndërkombëtar i kriminelëve të drogës kërkoi gjithashtu bashkëpunim ndërkombëtar nga policia belge dhe autoritetet gjyqësore. Policia dërgoi oficerë ndërlidhës në Kolumbi, Brazil, Turqi, Marok, Itali dhe Shqipëri.
Një magjistrat u emërua gjithashtu për të ruajtur bashkëpunimin me Emiratet e Bashkuara Arabe. Këto të fundit kanë ekstraduar tashmë trembëdhjetë të dyshuar në Belgjikë, përfshirë bosin holandez të drogës Flor Bressers dhe baronin e drogës nga Antëerp, Othman El Ballouti.
