Presidenti i Ukrainës, Volodymyr Zelensky, njoftoi se forcat speciale ukrainase kanë goditur selinë e FSB-së, agjencisë ruse të inteligjencës dhe sigurisë së brendshme, në pjesën e rajonit të Khersonit që ndodhet nën kontrollin e Moskës.

Sipas Zelenskyt, gjatë operacionit është shkatërruar edhe një sistem rus i mbrojtjes ajrore Pantsir-S1. Kreu i shtetit ukrainas publikoi në rrjetin social X një video nga momenti i sulmit, ndërsa theksoi se operacioni ka shkaktuar humbje të konsiderueshme për forcat ruse.

“Falë këtij operacioni të vetëm, humbjet ruse arrijnë në rreth njëqind të vrarë dhe të plagosur”, deklaroi Zelensky.

Ai shtoi se Rusia duhet të ndiejë presionin për t’i dhënë fund luftës, duke paralajmëruar se sulmet dhe “sanksionet” afatmesme e afatgjata të Ukrainës ndaj objektivave ruse do të vazhdojnë.

“Rusët duhet të ndiejnë nevojën për t’i dhënë fund kësaj lufte. ‘Sanksionet’ afatmesme dhe afatgjata të vendosura nga Ukraina do të vazhdojnë të funksionojnë”, u shpreh presidenti ukrainas, duke iu referuar operacioneve të fundit të forcave të armatosura të Kievit.