Asociacioni i Gazetarëve Shqiptarë (AGSH) ka denoncuar dhjetëra raste sulmesh ndaj gazetarëve dhe punonjësve të mediave gjatë protestave, duke kërkuar nisjen e hetimeve për çdo incident të raportuar. Përfaqësuesi i AGSH-së, Isa Myzyraj, deklaroi se janë dokumentuar 41 raste sulmesh të synuara ndaj mediave dhe gazetarëve, ndërsa rreth 60 punonjës mediash janë përfshirë në incidente.

I ftuar për të folur mbi situatën, Myzyraj theksoi se këto shifra dëshmojnë klimën e vështirë në të cilën po ushtrojnë profesionin gazetarët. Ai veçoi gjashtë raste që i cilësoi veçanërisht shqetësuese, ku punonjësit e mediave janë goditur me plumba gome nga policia.

“Na ka ndihmuar shumë fakti që shumica e rasteve janë të dokumentuara me pamje filmike”, u shpreh Myzyraj, duke nënvizuar se materialet filmike mund të shërbejnë si prova për zbardhjen e incidenteve.

Përfaqësuesi i AGSH-së kërkoi që Agjencia e Mbikëqyrjes Policore (AMP) dhe Prokuroria e Tiranës të nisin hetimet për të gjitha rastet e raportuara nga organizata. Ai kërkoi gjithashtu distancim dhe sqarime nga drejtori i Përgjithshëm i Policisë së Shtetit, Skënder Hita, duke argumentuar se, si drejtuesi më i lartë i strukturës policore, ai duhet të japë përgjigje për sulmet ndaj gazetarëve.

Myzyraj u bëri thirrje edhe partive politike, përfshirë partinë në pushtet, që të dënojnë publikisht dhunën ndaj gazetarëve dhe medias. Sipas tij, edhe deputetët duhet të tregojnë qartë qëndrimin e tyre kundër sulmeve ndaj punonjësve të medias.

“SPAK dhe Prokuroria e Tiranës, jemi gati t’u vëmë në dispozicion fakte”, deklaroi ai, duke shtuar se institucionet shtetërore kanë mekanizmat e nevojshëm për të nisur hetime kryesisht për rastet e dyshuara të tejkalimit të detyrës dhe ushtrimit të dhunës nga punonjësit e policisë.

Isa Myzyraj: 41 raste sulmesh të synuara ndaj mediave dhe gazetarëve. Kjo tregon klimën e vështirë dhe klimën e vështirë ku punojnë gazetarët.

Rreth 60 punonjës mediash janë përshirë në incidente. 6 raste janë më shqetësuese, kur policia ka përdorur ndaj punonjësve të mediave plumba gome.

Na ka ndihmuar shumë që shumica e rasteve janë të dokumentuar me pamje filmike.

AMP dhe Prokuroria e Tiranës, të nisin hetimet në të gjitha rastet e raportuara nga AGSH. I kërkojmë distancim dhe sqarim zotit Skënder Hitaj, I pari në listën e komandës së policisë dhe duhet të përgjigjet për rastet e sulmeve ndaj gazetarëve.

Partitë politike të dënojnë sulmet ndaj gazetarëve, përfshirë partinë në pushtet. Deputetët duhet të tregojnë që janë kundër dhunës ndaj gazetarëve dhe medias.

SPAK dhe prokuroria e Tiranës, jemi gati t’u vëmë në dispozicion fakte. Shteti ka mekanizma të nisë hetimet kryesisht për  një numër kaq të madh të tejkalimit të detyrës dhe ushtrimit të dhunës nga policia.