Ruben Amorim i surprizon të gjithë. Tekniku portugez ka vendosur plotë shtatë ditë pushim për Milanin. Trajneri Ruben Amorim ka vendosur që skuadra kuqezi të rikthehet në stërvitje vetëm të hënën, pas një periudhe të ngarkuar me ndeshje. Vendimi vjen pas fitores ndaj Genoas, që e riktheu Milanin në zonën Champions. Ndërkohë, 13 futbollistë janë grumbulluar me kombëtaret, ndërsa lojtarët e dëmtuar do të vijojnë rikuperimin me programe individuale. Filozofia e Amorim është e qartë: më pak ngarkesë fizike gjatë javës dhe më shumë fokus te puna taktike dhe automatizmat gjatë ndeshjeve.
Ndërkohë pauza e kampionatit sjell edhe lajme të rëndësishme nga fronti i merkatos. Juventusi dhe Milani po monitorojnë nga afër Nicolo Tresoldin, sulmuesin e Club Brugge që po spikat në Champions League. Kuqezinjtë kanë bërë lëvizjet e para, por ende nuk ka një marrëveshje konkrete, sikundër bën me dije edhe e përditshmja prestigjoze “La Gazzetta dello Sport”, që I ka dhënë hapësirën kryesore sulmuesit italo gjerman në faqen e pare. Interes për talentin italian kanë shfaqur edhe Chelsea, Bayern Munich dhe Manchester City. Club Brugge synon të përfitojë maksimalisht nga shitja e tij, duke e nisur garën për ofertat nga 50 milionë euro.
Ndërkohë të reja interesante edhe për sulmuesin e Real Madrid Endrick, që kërkon më shumë hapësira dhe nuk e përjashton largimin nga Real Madridi në merkaton e janarit. Sulmuesi brazilian, i cili deri tani ka regjistruar vetëm 140 minuta në shtatë ndeshje, është shprehur se dëshiron të luajë rregullisht dhe të zhvillojë karrierën e tij. Sipas mediave spanjolle, përfaqësuesit e tij kanë nisur kontaktet me disa klube. Në garë përveç kuqezinjve janë Roma dhe Sporting Lisbona, me portugezët që shihen si një alternativë interesante për shkak të mundësisë së ribashkimit me trajnerin Fonseca.
