Kombëtarja e femrave të Sheteve të Bashkuara të Amerikës do të luajë në çerekfinalet e Botërorit 2019. Për këtë, meritë kryesore ka Megan Rapinoe, e cila shënoi dy golat në fitoren e fundit kundër Spanjës. Por futbollistja 33-vjeçare është vendosur në qendër të vëmendjes jo për suksesin personal dhe të skuadrës së saj, por për polemikat në distancë që kanë përfshirë edhe presidentin Donald Trump.
Ky i fundit ka kritikuar Megan Rapinoe, e cila pikërisht në sfidën kundër Spanjës në 1/8 e Kupës së Botës, vendosi të mos e këndojë himnin e vendit të saj. “Nuk mendoj se është kjo sjellja e duhur”, ka thënë Trump, teksa ka shpjeguar se është shqetësuar nga veprimi i futbollistes. Por kjo nuk është hera e parë, që futbollistja amerikane, e cila luan Botërorin e tretë në karrierën e saj, përfshihet në polemika. Kjo për shkak të impenjimit të saj në kauzat për të drejtat civile.
E deklaruar hapur si pjesë e komunitetit gay, 33-vjeçarja që luan me Seattle iu bashkua shumë kampionëve të futbollit amerikan, që në shenjë proteste për politikat e Shtëpisë së Bardhë uleshin në gjunjë gjatë këndimit të hinmit.
(balkanweb)