Nga: OLA MITRE*
TIRANE – Ministria e Shëndetësisë ka shpallur 84 vende vakante për mjekë dhe infermierë, të shpërndara nëpër qendra shëndetësore në Gjirokastër, Përmet, Tepelenë, Fier, Mallakastër e Lushnjë. Bëhet fjalë për mjekë të përgjithshëm, mjekë specialistë dhe infermierë, ndërkohë që “Gazeta Shqiptare” publikon sot të plotë listën me vendet dhe pozicionet e kërkuara sipas qendrave shëndetësore. Duke iu referuar kësaj liste, në Qarkun e Gjirokastrës kërkohen 35 mjekë dhe infermierë, ndërsa për Qarkun e Fierit në total kërkohen 39 mjekë dhe infermierë. Ndër pozicionet e shpallura vakante ka edhe drejtorë, ndërsa sa u takon specialiteteve, kërkohen 1 radiolog për qendrën shëndetësore të Patosit dhe 1 obstetër-gjinekolog për qendrën shëndetësore nr.1 në Fier.
Sipas MSH-së, kandidatët e interesuar për këto vende pune duhet të kenë mbaruar studimet e larta universitare në një fakultet me program të akredituar nga Ministria e Arsimit dhe Sportit. Ndërsa, për kandidatët që kanë studiuar jashtë vendit, diploma e tyre duhet të jetë e njohur nga MAS. Dorëzimi i dokumenteve bëhet çdo ditë, nga ora 12:00 deri në orën 14:00, deri më datë 19 dhjetor 2015 për vendet vakante në Qarkun e Gjirokastrës, dhe deri më 21 dhjetor për Qarkun e Fierit, në protokollin e Ministrisë së Shëndetësisë. Për të kandiduar, çdo i interesuar duhet të dorëzojë: formularin e plotësuar dhe të firmosur (shih bashkëngjitur shkrimit), jetëshkrimin e tij (CV), diplomën universitare dhe certifikatën e notave, diplomën e specializimit (kopje e noterizuar) si dhe lejen e ushtrimit të profesionit nga urdhri përkatës (kopje e noterizuar).
Po ashtu, dokumentacioni duhet të plotësohet me një raport mjekësor të aftësisë për punë, fotokopjen e letërnjoftimit, dëshmi penaliteti (në pamundësi për ta marrë në kohë, deklaratë personale, dhe në rast shpalljeje fitues dëshmia do të sillet në momentin e lidhjes së kontratës) si dhe diploma apo dëshmi të tjera.
Përzgjedhja
Ndërkaq, sipas urdhrit me numër 87, të ministrit Ilir Beqaj, vlerësimi total për mjekët e përgjithshëm është 80 pikë, ndërsa për mjekët e specialiteteve është 100 pikë. Këto pikë mund të grumbullohen nga nota mesatare, njohja e gjuhëve të huaja, grada shkencore, eksperienca në profesion si dhe diploma e dëshmi të tjera kualifikimesh profesionale me afat mbi 2 javë. Ndërkohë që, sa u takon kritereve të vlerësimit, për personelin infermieror në qendrat shëndetësore, urdhri saktëson po të njëjtat kritere, por vlerësimi maksimal në këtë rast është 70 pikë.
(er.nu/Gazeta Shqiptare/BalkanWeb)
