Mëngjesin e sotëm është gjetur i pajetë në apartamentin e tij një shtetas i huaj. Ngjarja është regjistruar në fshatin turistik të Tushemisht në qytetin e Pogradecit ndërsa paraprakisht sipas policisë dyshohet se ky shtetas të ketë ndërruar jetë për shkaqe natyrale pasi ka pasur probleme shëndetësore.

Trupi i pajetë i këtij shtetasi është transportuar në morgun e spitalit të Pogradecit ndërsa pritet për t’u transportuar edhe në kryeqytetet për t’iu bërë me pas autopsia dhe për të përcaktuar shkakun e vdekjes.

Policia po heton për zbardhjen e mëtejshme të kësaj ngjarje ndërsa burimet thanë se viktima Najebul Hasan, rreth 60 vjeç është shtetas indian me nënshtetësi amerikane. Nga hetimet paraprake është mësuar se në banesë në vazot e luleve i është gjetur lëndë narkotike hashash. Sipas dëshmive viktima e kultivonte për konsum shëndetësor për sëmundjen që kishte.

Nga banorët mësohet se ai kishte 5 vjet që jetonte në Tushemisht ku kishte blerë një apartament, pasi mjekët e kishin këshilluar për klimën. Po kështu njerëzit që e njihnin kanë treguar për policinë se ai kishte pësuar edhe dy herë paralizë më herët.

Informacion paraprak
Mëngjesin e sotëm në fshatin Tushemisht, Pogradec, në banesën e tij është gjetur pa shenja jete shtetasi amerikan N. H., 62 vjeç.

Nga kqyrja paraprake e trupit, nuk janë konstatuar shenja dhune dhe dyshohet se ky shtetas mund të ketë gjetur vdekjen nga shkaqe natyrale, pasi ka patur probleme shëndetësore të mëparshme.

Po punohet për të përcaktuar shkakun e vdekjes dhe për të zbardhur rrethanat e ngjarjes.