Deputeti demokrat, njëherësh anëtari i Grupit të Rithemelimit, Oerd Bylykbashi, mohoi zërat se ka pasur negociata të fshehta mes Berishës dhe Bashës. I ftuar në ‘Open’ Bylykbashi tha se Basha po i zvarrit gjërat për të fituar sa më shumë kohë, duke nënvizuar se mes tij dhe Berishës nuk ka fare negociata.
“Nuk ka negociata fare mes tyre. 6 marsi është votë e njerëzve, që e kanë të qartë vendimin e tyre. Duket që konkluzioni është që Berisha të kandidojë për në krye të PD-së. Basha e kishte mundësinë për të pasur një kontribut deri para 11 dhjetorit, por nuk e ka më këtë pjesë. Askush nuk i heq mundësinë atij të jetë pjesë e proceseve.
Ai nuk po pranon asgjë. Atij ndoshta i pëlqen t’i zvarrisë gjërat, për të fituar kohë. Ai mendon se me këtë formë do gjejë vrimë për të dalë nga kjo situatë.
Por ka një parti të tërë kundër. Ka një grup të madh që e kanë shkarkuar ose i kanë kërkuar dorëheqjen. I kanë thënë që nuk bën më për këtë punë,” tha deputeti.
(BalkanWeb)
