Incidente të shumta janë shënuar sot (e martë) në mbrëmje mes tifozerive të Fejnord, Romës nga njëra anë dhe Policisë nga ana tjetër një ditë para finales së Ligës së Konferencës.
Më problematikët duket se kanë qenë tifozët holandezë, veçanërisht ata që janë grumbulluar që prej ditës së djeshme në Rrugën Mustafa Matohiti, poshtë shtëpisë së kryetarit të PD-së, Sali Berisha.
Policia bëri të ditur se rreth orës 21:00 dhjetra tifozë u përplasën me policinë, çka detyruan uniformat blu që të ndërhynin për ti shpërndarë.
Një pjesë e tyre iu drejtuan kryeministrisë ku edhe aty pati tensione me policinë. Më herët në një prej lokaleve pranë ushtarit të panjohur, një tifoz i Fejnord në gjendje të dehur goditi një të ri dhe sherri më pas degjenoi në përdorimin e karrigeve.
Ndërkohë që një tjetër incident, këtë herë me tifozët e Romës u shënua pranë Drejtorisë së Policisë në Tiranë te ura e Lanës. Një makinë u shkatërrua gjatë këtij incidenti.
Përplasja e tretë u regjistrua te pallati me shigeta, në hyrje të kryeqytetit, ku protagonist ishin sërish tifozët holandezë.
Policia bëri të ditur se si pasojë e këtyre përplasjeve janë plagosur nëntë efektivë, si dhe janë shoqëruar tre tifozë.
Njoftimi i Policisë
Tiranë/Informacion paraprak
Sonte në mbrëmje, një grup tifozësh kanë lëvizur në drejtim të stadiumit “Air Albania” dhe sipas informacioneve tentonin të përplaseshin me një grup tifozësh të skuadrës tjetër.
Shërbimet e Policisë kanë tentuar t’i ndalojnë në rrugën “Mustafa Matohiti”, ku tifozët e skuadrës Feyenoord, në mënyrë të dhunshme kanë goditur punonjësit e Policisë me shishe qelqi, shkopinj, gurë dhe sende të tjera të forta.
Më pas, një grup tjetër tifozësh, të skuadrës së Romës, kanë lëvizur në drejtim të urës së DVP Tiranë ku dhe atje janë përplasur me shërbimet e Policisë duke përdorur gurë, shishe e shkopinj.
Si pasojë e dhunës së ushtruar nga tifozët e të dy skuadrave, janë plagosur 10 punonjës Policie dhe është dëmtuar një automjet policie.
Shërbimet e Policisë kanë bërë të mundur shpërndarjen e tyre si dhe kanë shoqëruar në ambientet e Policisë 60 shtetas nga grupet e tifozëve të dyja skuadrave, 48 shtetas italian dhe 12 shtetas holandez dhe vijon shoqërimi i personave të tjerë, të përfshirë në akte të dhunshme.
Policia e Shtetit bën thirrje për shmangien e veprimeve të dhunshme, që nuk manifestojnë asnjë lidhje me sportin.
Policia e Shtetit është e vendosur për të garantuar rendin dhe sigurinë, për të parandaluar shkatërrimin e pronës si dhe për të garantuar mbarëvajtjen e aktivitetit sportiv që do të zhvillohet në “Air Albania”. Dhe për këtë ka marrë të gjitha masat që parashikon ligji.
Policia e Shtetit kërkon mirëkuptimin e qytetarëve që të mos provokohen nga individë apo grupe tifozësh që mund të jenë nën efektin e alkoolit dhe të njoftojnë menjëherë në 112 dhe Komisariatin Dixhital çdo tentativë të prishjes së rendit dhe sigurisë.
Të plagosurit
R.K polic
S.Dh. Polic
Sh.M polic
K.H polic
S.N. polic
A.G. polic
E.B. polic
A.K. polic
Sh.M polic
A.M Italian
D.N Italian
P.B. Italian
F.R hollandez
