Të paktën 17 persona u vranë nga rrufeja në shtetin lindor të Indisë, Bihar, njoftoi transmetuesi shtetëror All India Radio (AIR).

Reshje të dendura shiu dhe bubullima të shoqëruara me vetëtima kanë goditur shtetin gjatë 24 orëve të fundit, duke prekur gjashtë rrethe.

Zyrtarët thanë se shumica e viktimave ishin fermerë që punonin në fusha kur ra rrufeja.

Sipas AIR, pesë persona, përfshirë tre fëmijë, u vranë në Gaya, ndërsa 12 të tjerë humbën jetën në rrethet Bhojpur, Aurangabad, Jehanabad, Kaimur dhe Rohtash.

Departamenti meteorologjik ka parashikuar reshje të dendura shiu mbi Indinë verilindore gjatë pesë ditëve të ardhshme dhe mbi Bihar, Jharkhand dhe Bengalin Perëndimor nën Himalaje dhe Sikkim gjatë tre ditëve të ardhshme.

Kryeministri i Biharit, Nitish Kumar ka shprehur pikëllimin për aksidentet dhe ka njoftuar lehtësim për familjet e viktimave.

“Kryeministri ka njoftuar një pagesë prej 400,000 INR (5,018 dollarë amerikanë) për të afërmit e viktimave”, tha një zëdhënës i qeverisë.

Kumar gjithashtu u ka kërkuar njerëzve që të qëndrojnë vigjilentë në mot të keq dhe të ndjekin sugjerimet e lëshuara nga departamenti i menaxhimit të fatkeqësive.

Gjatë muajve qershor dhe korrik, mbi 60 njerëz u vranë nga goditjet e rrufesë në të gjithë shtetin Bihar.

Çdo vit me fillimin e sezonit të musoneve, qindra njerëz vdesin nga rrufetë në Indi.