Kryetari i Partisë Republikane, Fatmir Mediu u thirr këtë të mërkurë në SPAK për të dhënë dëshminë e tij lidhur me çështjen e privatizimit të ish-kompleksit “Partizani”, ndërsa të premten pritet që Prokuroria e Posaçme t’i dërgojë kërkesë Kuvendit edhe për Sali Berishën, për të dëshmuar për këtë rast.
Profesori Artan Fuga, i ftuar në rubrikën “Opinion” në News24, për këtë rast, tha se nuk do të donte që një deputet, ish-ministër apo një përfaqësues i opozitës të ishte i inkriminuar, ndërsa shtoi se nuk sheh një balancë mes denoncimeve, pasi nga ana e opozitës përfliten emra të cilën janë aktivë në politikë, ndërsa nga ana e maxhorancës, janë figura të cilat tashmë nuk kanë një funksion.
“Nuk jam në gjendje të di këtë rast, por nuk do doja të ishte i inkriminuar asnjë deputet, ish-ministër, aq më pak një përfaqësues i opozitës… ajo që shoh janë një lumë denoncimesh ndaj figurave të opozitës e cila nuk më lë një shije shumë të mirë, sepse ata që po denoncohen dhe janë marrë në hetim apo janë thirrur në SPAK janë në opozitë, kurse ata që janë marrë nga pushtetarët, e kanë lënë detyrën, pra nuk ka një balancë.
Ndërsa një ish-funksionar i lartë duhet të paraqitet sa herë e thërrasin në organet drejtësisë për të dëshmuar legjitimitetin e akteve të tyre, e shoh normale, por nëse nuk është selektive. Pra nëse s’ka denoncime që janë aktualisht në pushtet, jo ata që kanë qenë, nëse ka një seleksion të kësaj natyre, kjo nuk i shërben drejtësisë. Për thelbin e dosjeve të caktuara, me thënë të drejtën s’di asgjë dhe do preferoja kur fatet të dalin të ndjek atë që prokuroria ka argumentuar”, tha ai.
