Bordi Ekzekutiv i Fondit Monetar Ndërkombëtar, donatori kryesor i Ukrainës, ka miratuar ndarjen e afro 1.3 miliardë dollarëve si pjesë e instrumentit të financimit të shpejtë.

Kështu ka thënë presidenti i Ukrainës, Volodymyr Zelensky, i cili e ka postuar lajmin në Twitter.

“Bordi Ekzekutiv i FMN-së sapo ka mbështetur sigurimin e rreth 1.3 miliardë dollarëve për Ukrainën sipas Instrumentit të Financimit të Shpejtë”, shkroi lideri të premten në Twitter.

Paratë do të dërgohen në Ukrainë “sot”, shtoi Zelensky.

Presidenti falënderoi drejtoreshën menaxhuese të FMN-së Kristalina Georgieva dhe Bordin Ekzekutiv për mbështetjen e tyre.

Siç u raportua më herët, Bordi Ekzekutiv i FMN-së miratoi më 30 shtator një dritare të re nën instrumentet e saj të financimit emergjent, që do t’i lejojë Ukrainës të kërkojë një disbursim të ri sipas Instrumentit të Financimit të Shpejtë.

RFI hap një akses të shpejtë në asistencë financiare për vendet që kanë nevojë urgjente për të mbyllur boshllëqet e bilancit të pagesave, veçanërisht ato që lindin nga lufta.