Një i ri rus është gjobitur pasi kishte parë në ëndërr presidentin e Ukrainës Volodymyr Zelensky dhe kishte postuar në Instagram në lidhje me eksperiencën e tij.
26-vjeçari Ivan Losev doli në gjyq javën e kaluar në qytetin siberian të Chita në rajonin Zabaykalsky të Rusisë dhe u shpall fajtor sipas ligjeve drakoniane që ndalojnë kritikat ndaj pushtimit të Ukrainës nga presidenti Vladimir Putin.
Gjykata e shpalli Losev fajtor për “diskreditim” të ushtrisë ruse më 8 dhjetor dhe e gjobiti atë me 30,000 rubla ose rreth 400 £, ndërsa autorët e kësaj vepre rrezikojnë gjithashtu deri në 15 vjet burg.
Ligji u miratua në mars, një muaj pasi Putini urdhëroi trupat e tij të kalonin kufirin, për të shtypur disidencën dhe për të mbytur kritikat ndaj luftës, e cila ka rezultuar në vdekjen e dhjetëra mijëra ushtarëve rusë.
Në postimin e tij të fshirë që atëherë në Instagram, rusi përshkroi ëndrrën e tij për ndjekësit e tij, duke thënë se kishte ëndërruar se ishte mobilizuar nga Moska dhe ‘sjellur në një lloj kampi përgatitor’ për rekrutët rusë.
“Ëndërrova se isha mobilizuar dhe më sollën në një lloj kampi stërvitor kur papritmas u futën forcat e armatosura ukrainase, të udhëhequra nga Zelensky”, shkroi ai në postimin e tij.
“Ata i lidhën të gjithë dhe do të na qëllonin. Por në atë moment, Zelensky më kalon dhe më thotë: ‘Kam parë postimet e tua në Instagram, lavdi Ukrainës!’ Më pas ai tha se në ëndrrën e tij, Zelensky e liroi, por urdhëroi që të qëlloheshin të gjithë të tjerët.
