Qindra familje mbeten të bllokuara nën rrënojat e ndërtesave të shembura në Sirinë veriperëndimore pas tërmetit të fuqishëm të së hënës. Kështu bëjnë me dije Helmetat e Bardha, të njohura zyrtarisht si Mbrojtja Civile e Sirisë.
Më shumë se 790 viktima janë konfirmuar të vdekur në pjesët e kontrolluara nga rebelët në veriperëndim të Sirisë dhe më shumë se 2,200 të plagosur, thanë Helmetat e Bardha në Twitter. “Numrat pritet të rriten ndjeshëm sepse qindra familje janë ende nën rrënoja”, tha grupi.
Më shumë se 210 ndërtesa u shkatërruan nga tërmeti në veriperëndim të Sirisë, theksoi ky grup. Siria, një vend që tashmë po vuan efektet e luftës civile, po përballet me një shkatërrim të gjerë nga tërmeti. Më shumë se 1,500 viktima dhe 3,600 të plagosur janë raportuar në të gjithë vendin, sipas zyrtarëve.
Rreth 4 milionë njerëz në Sirinë veriore tashmë janë zhvendosur dhe mbështeten tek shoqatat humanitare si rezultat i luftës, tha më herët një zëdhënës i UNICEF-it, raporton CNN. Ndër shqetësimet kryesore tani është mungesa e aksesit në strehimore dhe të ujë të pijshëm të sigurt mes kushteve të motit të ngrirë dhe rrezikut të përhapjes së sëmundjeve të tilla si kolera.
(BalkanWeb)
