Koha e pritjes mbaroi. Napoli është rikthyer te titulli kampion pas 33 vitesh. Ekipi i drejtuar nga Lucciano Spalleti barazoi 1-1 ndaj Udineses në “Dacia Arena”, duke fituar Skudeton tashmë edhe matematikisht, pasi sonte mjaftonte vetëm një pikë.
Vendasit shënuan të parët me Lovric në minutë ne 13-të. Mysafirët u futën në pjesën e dytë me një dëshirë të madhe për të vendosur ekuilibrat dhe Osimhen riktheu gjithçka nga fillimi me golin e tij në minutën e 53-të.
Napoletanët kanë zhvilluar një sezon perfekt. Pas 33 javësh kampionat, skuadra ka grumbulluar 80 pikë dhe numëron deri më tani 25 fitore, 5 barazime dhe 3 humbje. Ky është titulli i 3-të i Napolit në historinë e saj. Klubi numëron gjithashtu edhe 6 Kupa të Italisë, 2 Superkupa dhe 1 Kupë UEFA.
Që në fillimin e edicionit, tifozët kanë mbështetur skuadrën në maksimum, duke marrë pjesë në çdo transfertë dhe duke dhuruar spektakël në tribuna. Festa e ligjshme e tifozëve pritet të zgjasë me ditë të tëra.
(BalkanWeb)
