Ishte në dyshim të fortë, më saktë nuk duhet të luante pasi vinte nga Brazili me një dëmtim në gju, por Rodrygo jo vetëm zbriti në fushë nga minuta e parë kundër Cadiz, por realizoi një “dopietë” fantastike, udhëhoqi Real Real Madrid në suksesin e pastër 0-3 në transfertë. Në minutën e 14-të, sulmuesi brazilian realizoi një super gol duke kaluar “mbretërorët” në avantazh. Me fillimin e pjesës së dytë, Rodrygo, sërish me një aksion të bukur personal shënoi dhe golin e dytë.
Nuk mund të mungonte në këtë “banket” as Jude Bellingham i cili në minutën e 74-ët kompletoi fitoren e Real Madrid që për momentin e sheh vetën në krye të La Liga-s. Pavarësisht fitores, Carlo Ancelotti nuk ka shumë arsye për të festuar pasi në këtë sfidë humbi një tjetër lojtar, Luka Modric. Mesfushori kroat i bashkohet në infermieri lojtarëve të tjerë si Vinicius Jr, Guler, Militao, Kepa, Courtouis, Camavinga, Tchouameni dhe së fundmi Brahim Diaz i cili u dëmtua në momentet e fundit, ishte projektuar si titullar kundër Cadiz.
Në pritje të lojtarëve të dëmtuar, Real Madrid pritet të jetë aktiv në janar, për të afruar ndonjë lojtar pasi situata është shumë e vështirë. Sipas mediave spanjolle, Reali po shqyrton mundësinë për të transferuar në Madrid, Mauro Icardi-n. Sulmuesi argjentinas po kalon një rini të dytë teksa këtë sezon në 13 ndeshje me Gallatasari ka shënuar 11 gola.
