Kreu i SPAK Altin Dumani gjatë një takimi informal me gazetarët tha se institucioni që ai drejton ka gati strategjinë për hetimin e krimeve zgjedhore dhe së shpejti do ta bëjnë publike.
Gjatë takimit, ai iu përgjigj interesimit të medias për çështje shumë sensitive, mes tyre dhe komunikimet e Sky ECC dhe përfshirjen e politikanëve në këto komunikime.
Sipas kryeprokurporit të SPAK i vetmi politikan që deri më tani është lidhur direkt dhe është arrestuar është ish-deputeti socialist Jurgis Cyrbja. Ai tha se SPAK nuk ka të gjithë databazën e Sky Ecc dhe për çdo rast kërkon ndihmë nga partnerët, kur ka dyshime që një përdorues është i përshirë në vepra penale. Ndërsa garantoi se SPAK do të godasë këdo, pavarësisht pushtetit.
Sa iu përket deklaratave të ish-zv.kryeministrit Arben Ahmetaj lidhur me një aferë korruptive me tunelin e llogarasë z.Dumani deklaroi se nuk mund të bëjë komente për shkak të hetimit.
Ai u ndal edhe te çështja e “21 janarit” ku theksoi se hetimet janë shumë dinamike dhe intensive.
Lidhur me hetimet ndaj kryebashkiakut të Tiranës, Erjon veliaj, Dumani tha se kontrollet janë një mjet për kërkimin e provës, por sa i përket ecurisë së hetimeve nuk mund të japë informacion. Lidhur me akuzat politike në adresë të tij, Altin Dumani deklaroi se ka zgjedhur të mos bëjë asnjë koment.
(BalkanWeb)
