Presidenti i SHBA, Donald Trump i ka bërë një tjetër thirrje fqinjit verior, Kanadasë që të bëhet shteti i 51-të amerikan. Në një postim të gjatë në rrjetin social Truth, Trump përsëriti kostot që i shkakton Kanadaja buxhetit të SHBA.
Sipas tij, SHBA-ja subvencionon Kanadanë me më shumë se 200 miliardë dollarë në vit dhe se kjo marrëdhënie duhet të ndryshojë. Ai argumentoi se “vetëm nëse Kanadaja bëhet shteti i 51-të i SHBA-së”, do të eliminoheshin tarifat dhe do të siguroheshin përfitime ekonomike për të dyja vendet, përfshirë “uljen e taksave dhe rritjen e sigurisë për qytetarët kanadezë”.
“Ne po e subvencionojmë Kanadanë me mbi 200 miliardë dollarë çdo vit. PSE??? Kjo nuk mund të vazhdojë. E vetmja gjë që ka kuptim është që Kanadaja të bëhet shteti ynë i 51-të,” shkruante Trump në postimin e tij.
Trump vazhdoi të theksojë se një hap i tillë do ta bënte SHBA-në më të fuqishme dhe do të zhdukte “vijën artificiale” që ndan dy kombet. Ai gjithashtu tha se ky vendim do të kishte përfitime të dukshme, duke përfshirë zhdukjen e tarifave dhe rritjen e stabilitetit në rajon.
Donald Trump njoftoi sot se do të rrisë tarifat për çelikun dhe aluminin që vijnë nga Kanadaja me 50%, si reagim ndaj tarifave të vendosura nga Kanadaja për eksportet e energjisë elektrike në SHBA. Ai gjithashtu tha se mund të shpallë një emergjencë kombëtare për energjinë elektrike në rajonet e prekura dhe parlajmëroi Kanadanë se nëse tarifat prej 15% nuk do të ulen, tarifa më të larta do të vendosen edhe për automjetet kanadeze.
Më herët sot, kryeministri i Ontarios, Doug Ford, kërcënoi se Kanadaja do të ndërpresë energjinë elektrike për 3 shtete amerikane në kufi me të.
Postimi i plotë në Truth i Donald Trump
Bazuar në vendimin e Ontarios, Kanada, që ka vendosur një tarifë prej 25% për “Energjinë” që hyn në Shtetet e Bashkuara, kam urdhëruar Sekretarin tim të Tregtisë të shtojë një tarifë SHTESË prej 25%, duke e çuar në 50%, për të gjitha ÇELIKUN dhe ALUMININ që hyjnë në Shtetet e Bashkuara nga Kanada, një nga kombet me tarifat më të larta në botë. Kjo do të hyjë në fuqi TË MËNGJESIN E NESËRM, më 12 mars.
Po ashtu, Kanadaja duhet menjëherë të heqë tarifën e saj kundër bujqve amerikanë prej 250% deri 390% për disa produkte të qumështit nga SHBA, e cila është konsideruar prej kohësh si një padrejtësi. Pothuajse menjëherë do të shpall një emergjencë kombëtare për energjinë elektrike në zonën e kërcënuar. Kjo do t’i mundësojë SHBA-së të bëjë atë që duhet bërë për të lehtësuar këtë kërcënim abuziv nga Kanadaja.
Nëse tarifat e tjera të rënda dhe të vjetra nuk do të hiqen gjithashtu nga Kanadaja, unë do të rris ndjeshëm, më 2 prill, tarifat për makinat që hyjnë në SHBA, gjë që do të çojë në mbylljen përfundimtare të industrisë së prodhimit të automjeteve në Kanada. Ato makina mund të prodhohen lehtësisht në SHBA!
Po ashtu, Kanadaja paguan shumë pak për Sigurinë Kombëtare, duke u mbështetur në Shtetet e Bashkuara për mbrojtjen ushtarake. Ne po subvencionojmë Kanadanë me më shumë se 200 miliardë dollarë në vit. PSE??? Kjo nuk mund të vazhdojë. E vetmja gjë që ka kuptim është që Kanada të bëhet shteti i 51-të më i dashur i yni. Kjo do të bëjë që të zhduken të gjitha tarifat dhe çdo gjë tjetër. Tatimet për kanadezët do të ulen ndjeshëm, ata do të jenë më të sigurt, ushtarakisht dhe përndryshe, sesa kanë qenë ndonjëherë, nuk do të ketë më probleme me kufirin verior, dhe kombi më i madh dhe më i fuqishëm në botë do të bëhet më i madh, më i mirë dhe më i fortë se kurrë — dhe Kanada do të jetë një pjesë e madhe e kësaj.
Linja artificiale e ndarjes që u tërhoq shumë vite më parë do të zhduket më në fund, dhe ne do të kemi Kombin më të sigurt dhe më të bukur kudo në botë — dhe himni juaj i shkëlqyer, “O Kanada”, do të vazhdojë të luhet, por tani duke përfaqësuar një SHTET TË MADH dhe TË FUQISHËM brenda Kombit më të madh që bota ka parë ndonjëherë!
(BalkanWeb)
