Donald Trump kërcënoi të enjten se do të vendosë tarifa masive për pijet alkoolike evropiane në përgjigje të hakmarrjes së Bashkimit Evropian kundër tarifave amerikane për çelikun dhe aluminin, duke përshkallëzuar më tej luftën tregtare, e cila duket se po del jashtë kontrollit.
Në një postim në Truth Social, Trump tha se administrata e tij do të vendosë një tarifë 200% për pijet alkoolike nga BE-ja, nëse ajo nuk shfuqizon tarifën prej 50% që qeveria evropiane vendosi për uiski amerikan të mërkurën.
“Nëse kjo tarifë nuk hiqet menjëherë, Shtetet e Bashkuara së shpejti do të vendosin një tarifë 200% për të gjitha verërat, shampanjat dhe pijet alkoolike me origjinë nga Franca dhe vendet e tjera të përfaqësuara nga BE-ja”, tha Trump.
Në fakt, ai e quajti BE-në një nga autoritetet tatimore dhe tarifore më armiqësore dhe abuzive në botë, të krijuar me qëllimin e vetëm për të shfrytëzuar Shtetet e Bashkuara dhe e përshkroi tarifën hakmarrëse të vendosur ndaj burbonit amerikan si ” të tmerrshme “.
Franca dhe partnerët e saj, si Bashkimi Evropian nuk do të dorëzohen ndaj kërcënimeve tarifore të SHBA-së dhe Franca do të mbrojë industritë e saj, tha sot ministri francez i Tregtisë Laurent Saint-Martin , duke reaguar ndaj sulmeve të reja të presidentit amerikan.
“Donald Trump ka filluar të përshkallëzojë luftën tregtare që ai vetë zgjodhi të lëshojë. Franca mbetet e vendosur të përgjigjet së bashku me Komisionin Evropian dhe partnerët tanë.”Ne nuk do t’i dorëzohemi kërcënimeve dhe do të mbrojmë gjithmonë industritë tona, ” theksoi Saint-Martin në një postim në X.
Kërcënimet e reja të Donald Trump shkaktuan rënien e aksioneve të kompanive të pijeve alkoolike.
Midis tyre, Pernod Ricard (Chivas Regal, Absolut dhe marka të tjera të njohura), Rémy Cointreau dhe Davide Campari ranë me më shumë se 3%.
(BalkanWeb)
