Presidenti amerikan Donald Trump ka lënë të kuptohet se ai mund të jetë i gatshëm të negociojë me vendet për tarifat , duke thënë se kjo “varet” dhe “për sa kohë që ato ofrojnë diçka të mahnitshme”, sipas gazetarëve që udhëtonin me të në Florida.

” Tarifat na japin shumë fuqi negociuese. Ato gjithmonë e kanë bërë. Unë i kam përdorur shumë mirë në administratën e parë,” u tha presidenti amerikan gazetarëve gjatë fluturimit në Air Force One. “Tani ne po e çojmë atë në një nivel krejtësisht të ri,” shtoi ai.

Hapja e Trump ndaj negociatave dukej se binte ndesh me deklaratat e mëparshme të Sekretarit të Tregtisë Howard Lutnick dhe këshilltarit të lartë të tregtisë Peter Navarro. “Ky nuk është një negociatë,” tha Navarro në CNBC.

Howard Lutnick më herët i tha CNN se Trump “nuk do të tërhiqet” nga tarifat e tij të reja. “Unë nuk mendoj se ka ndonjë shans” që Trump të tërhiqet nga ajo që ai e quajti një “rirregullim i tregtisë globale”, sipas Sekretarit të Tregtisë së SHBA.

Trump këmbënguli më herët gjatë ditës, përpara se të largohej nga Uashingtoni, se tregjet do të “lulëzojnë” pasi të shpalosen efektet e tarifave, por të paktën të enjten, tregu i aksioneve pati seancën e tij më të keqe që nga fillimi i pandemisë Covid-19 pesë vjet më parë.

Presidenti amerikan, megjithatë, tha se rënia e ndjeshme në Wall Street ishte e pritshme dhe mbrojti vendimin e tij për të vendosur tarifa, duke argumentuar se ishte një masë e nevojshme për të shëruar ekonominë “të sëmurë” amerikane.