Kreu i shërbimit të inteligjencës së brendshme të Izraelit ka njoftuar dorëheqjen e tij për shkak të dështimit të agjencisë për të paralajmëruar për sulmin vdekjeprurës të 7 tetorit 2023 nga Hamasi.

Kreu i Shin Bet, Ronen Bar, tha se do të japë dorëheqjen më 15 qershor, pas një mosmarrëveshjeje me kryeministrin izraelit Benjamin Netanyahu, i cili u përpoq ta rrëzonte atë muajin e kaluar.

Bar e bëri njoftimin të hënën në një aktivitet përkujtimor për ushtarët e rënë të Shin Bet.

“Pas vitesh në shumë fronte, një natë, në frontin jugor, qielli u shemb”, tha Bar duke iu referuar sulmit, i cili vrau më shumë se 1,200 njerëz në Izraelin jugor dhe shkaktoi luftën Izrael-Hamas në Gaza. “Të gjitha sistemet u shembën. Shin Bet gjithashtu dështoi të jepte një paralajmërim.”

Kushdo që nuk arriti ta ndalojë sulmin duhet të përulë kokën “me përulësi para të vrarëve, të vdekurve, të plagosurve, të rrëmbyerve dhe familjeve të tyre dhe të veprojë në përputhje me rrethanat”, tha ai në këtë aktivitet.

Netanyahu u përpoq ta shkarkonte Barin muajin e kaluar për shkak të asaj që ai e quajti një krizë besimi rreth sulmit të Hamasit.

Por ky veprim shkaktoi trazira brenda vendit sepse Shin Bet po heton lidhjet midis zyrës së Netanyahut dhe Katarit, një ndërmjetës midis Hamasit dhe Izraelit për luftën në Gaza.

Shin Bet po heton akuzat se këshilltarët e ngushtë të Netanyahut vepruan si konsulentë të paguar për Katarin — i cili nuk ka marrëdhënie të plota diplomatike me Izraelin — ndërsa punonin edhe për kryeministrin. Netanyahu nuk është implikuar drejtpërdrejt në hetim.

Gjykata Supreme e Izraelit ngriu shkarkimin e Barit pas disa kundërshtimeve ligjore kundër këtij veprimi dhe u bëri thirrje palëve të arrijnë një kompromis.

Në fjalimin e tij të hënën, Bar tha se procedurat gjyqësore “nuk kanë të bëjnë me çështjen time personale, por me pavarësinë e krerëve të ardhshëm të Shin Bet”.

Bar paraqiti një dokument në Gjykatën Supreme javën e kaluar ku akuzonte Netanyahun se po përpiqej të shfrytëzonte pushtetin e Shin Bet për përfitime politike dhe personale.

Organizatat e shoqërisë civile thonë se kreu i Shin Bet është menduar të jetë një figurë e pavarur dhe kanë frikë se largimi i Bar do t’i hapë rrugën kryeministrit për të emëruar një aleat në postin e ndjeshëm.

Shin Bet është përgjegjëse për monitorimin e grupeve militante palestineze, dhe Bar më parë ka pranuar dështimet e agjencisë së tij në parandalimin e sulmit të Hamasit më 7 tetor.

Netanyahu i ka fajësuar për dështimet ushtrinë dhe agjencitë e sigurisë dhe vazhdimisht i ka rezistuar thirrjeve për një komision zyrtar hetimor shtetëror.

Bar është një nga disa figura të larta të sigurisë izraelite që dha dorëheqjen ose u shkarkua pas sulmit të Hamasit – përfshirë ish-ministrin e mbrojtjes dhe shefin e ushtrisë.

Këtë muaj, Netanyahu vendosi të emërojë një ish-komandant të marinës si shefin e ri. Emërimi u anulua më pak se 24 orë më vonë, pasi u bë e ditur se i nominuari kishte marrë pjesë në protesta antiqeveritare.

 

(A.A/BalkanWeb)