Kryeministri Edi Rama u ka dërguar një mesazh mobilizimi zgjedhësve shqiptarë nga jashtë vendit që të përpiqen të dorëzojnë zarfet me fletët e votimit për zgjedhjet e 11 majit.
Duke vlerësuar shifrat e deritanishme, Rama u shpreh se ende mbetet një numër i konsiderueshëm votash që nuk janë dorëzuar.
Ai u kërkoi shqiptarëve që votojnë për herë të parë nga jashtë vendit që të mos presin që postierët të marrin fletët në shtëpitë e tyre, por bëri thirrje që ato të dorëzohen nga vetë qytetarët në pikat postare të kompanisë DHL.
Rama: Jam duke u nisur për në Fushë Krujë, por po shoh të dhënat e KQZ dhe të zarfeve të dorëzuara në KQZ. Jemi në një situatë ku është vërtetë inkuarjuese pjesëmarrja e lartë, por si hera e parë duhet të jetë shumë më e lartë besoj unë. Do ju thosha shqiptarëve të Italisë që janë në krye, forca. Janë edhe 21 mijë zarfa të padorëzuar. Do t’u thosha shqiptarëve në Greqi që janë mbrapa jo për fajin e tyre, por për kompaninë e dorëzimit, forca forca forca. Ka akoma kohë. Mos prisni më që të vijnë t’ua marrin zarfet, por kthejini mbrapsht në pikat postare të DHL. Në Gjermani ka 7 mijë zarfe pa dorëzuar, bëni një përpjekje të fundit. Në SHBA ka mbi 5 mijë pa dorëzuar, etj. Në total ka një shifër inkurajuese. Ka 15 mijë të dorëzuara nga 17 mijë të shpërndara në vende të tjera. Do ju lutesha të ecim sa më shpejt, është një votë historike, një moment historik. Do të ishte gjynah që pas këtij mundimi për regjistrimin të mos bëni mundimin për të dorëzuar fletën e votimit. Në total jemi në 65%, fluksi mbetet i lartë, por ditët shkurtohen. Deri të premten gjithçka duhet të jetë përfunduar, kështu që forca, për Shqipërinë me BE në Evropë, për pasaportën evropiane të shqiptarëve dhe identitetin evropian.
