Sherri në Pogradec mes një mbështetësi të PD dhe komisionerit socialist nuk u mbyll brenda Qendrës së Votimit. Teksa vijonte procesi i votimit, Luan Tollozhina, simpatizant demokrat ka goditur komisionerin e PS, Entin Gega. Incidenti ka ndodhur në Qendrën e Votimit nr.3901. Sherri dyshohet se ka ndodhur për arsye personale dhe nuk ka lidhje me procesin zgjedhor.
Por konflikti nuk u shua brenda mureve të QV-së.
Gazetarja e News24, Lorena Kodra raporton se të afërm të Tollozhinës i kanë shkuar në banesë Gegës dhe kanë goditur bashkëshorten dhe djalin e tij.
Pogradec/Informacion paraprak
Rreth orës 13:00, në Pogradec shtetasit R. T., dhe E. M., D. M., (nipërit e shtetasit të arrestuar L. T.), pas konfliktit të ndodhur në qendrën e votimit nr. 3901, kanë shkuar në banesën e shtetasit E. G., 52 vjeç, (komisioner i kësaj qendre votimi), dhe kanë goditur familjarët e 52-vjeçarit (bashkëshorten dhe djali).
Djali i 52-vjeçarit po merr mjekim në spital jashtë rrezikut për jetën, ndërsa bashkëshortja e 52 vjeçarit ndodhet në ambientet e Komisariatit për të dhënë kallëzim.
Grupi hetimor po punon për zbardhjen e rrethanave të ngjarjes, dokumentimin ligjor të saj, si dhe kapjen dhe shoqërimin e këtyre shtetasve.
(BalkanWeb)
