I dërguari special i Presidentit të SHBA-së, Donald Trump, në Lindjen e Mesme u zotua të bëjë presion mbi Izraelin që të rifillojë ndihmën humanitare në Rripin e Gazës në këmbim të lirimit nga grupi palestinez Hamas të pengut amerikano-izraelit Edan Alexander, raportoi transmetuesi publik izraelit KAN.
Angazhimi i Steve Witkoff u bë pa dijeninë e Izraelit gjatë negociatave të zhvilluara veçmas nga Tel Avivi, tha KAN.
Hamasi e liroi Aleksandrin javën e kaluar pas bisedimeve të udhëhequra nga Witkoff.
Kryeministri izraelit Benjamin Netanyahu tha në një deklaratë nga zyra e tij se lirimi ndodhi “pa kushte ndaj Hamasit” dhe ishte për shkak të presionit ushtarak të Izraelit dhe përpjekjeve diplomatike të Trump.
Megjithatë, transmetuesi raportoi të hënën se Witkoff e siguroi Hamasin gjatë negociatave se do ta nxiste Izraelin të lejonte ndihmën në Gaza, një premtim i bërë pa informuar Tel Avivin.
KAN tha se Netanyahu më vonë i bëri një premtim Witkoff pak para lirimit të Alexander për të rifilluar menjëherë ndihmën pa u bërë publike ose me anë të një njoftimi në media.
Më vete, gazeta Washington Post raportoi të hënën, duke cituar një burim izraelit të njohur për marrëdhëniet SHBA-Izrael, se ekipi i Trump i dërgoi Izraelit një mesazh duke thënë “ne do t’ju braktisim nëse nuk e ndalni luftën”.
Ushtria izraelite ka përshkallëzuar gjenocidin e saj ditët e fundit, duke njoftuar nisjen e një operacioni tokësor në pjesët veriore dhe jugore të Rripit të Gazës.
Izraeli ka vazhduar të imponojë një politikë sistematike të urisë ndaj afërsisht 2.4 milionë palestinezëve në Gaza duke mbyllur të gjitha kalimet për të dërguar ndihma që kanë mbetur të bllokuara në kufi që nga 2 marsi. Bllokada e ka shtyrë enklavën drejt urisë.
Ndërkohë, negociatat indirekte midis Hamasit dhe Izraelit janë duke u zhvilluar në Katar në një përpjekje të përtërirë për të arritur një armëpushim dhe për të rënë dakord për një shkëmbim të burgosurish.
Megjithatë, KAN raportoi më herët të hënën se bisedimet nuk kanë shënuar përparim dhe se Tel Avivi po shqyrton tërheqjen e delegacionit të tij nga Doha “përveç nëse ka një zhvillim të jashtëzakonshëm në negociata”.
Hamasi ka shprehur vazhdimisht gatishmërinë e tij për të liruar të gjithë robërit izraelitë menjëherë, me kusht që Izraeli të ndalojë fushatën e tij ushtarake, të tërhiqet nga Gaza dhe të lirojë të burgosurit palestinezë.
Netanyahu ka vazhduar të vendosë kushte të reja, i fundit prej të cilave është çarmatimi i fraksioneve palestineze të rezistencës. Hamasi dhe grupe të tjera e kanë refuzuar kërkesën, duke këmbëngulur se për sa kohë që vazhdon pushtimi izraelit, çarmatimi nuk është i negociueshëm.
Ushtria izraelite ka ndërmarrë një ofensivë brutale kundër Gazës që nga tetori i vitit 2023, duke vrarë gati 53,500 palestinezë, shumica prej tyre gra dhe fëmijë.
Gjykata Ndërkombëtare Penale lëshoi urdhër-arreste nëntorin e kaluar për Netanyahun dhe ish-ministrin e tij të Mbrojtjes, Yoav Gallant, për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.
(A.A/BalkanWeb)
