Presidenti turk, Recep Tayyip Erdoğan, zhvilloi një takim me kryeministrin hungarez, Viktor Orban, të mërkurën në Budapest, në kuadër të një samiti informal të Organizatës së Shteteve Turkike (OTS). Gjatë takimit, të dy liderët diskutuan marrëdhëniet dypalëshe, si dhe zhvillimet rajonale dhe globale.
“Gjatë takimit, Presidenti Erdogan deklaroi se Turqia dhe Hungaria ndajnë lidhje të thella dhe se do të vazhdojnë të ndërmarrin hapa për të forcuar bashkëpunimin në të gjitha fushat”, tha Drejtoria e Komunikimit e Turqisë në një deklaratë.
Ai vlerësoi gjithashtu organizimin e Samitit të OTS-së në Budapest, duke e cilësuar si një sinjal të rëndësishëm të angazhimit të Hungarisë ndaj organizatës, ku ajo merr pjesë si anëtare vëzhguese. Erdoğan tha se Hungaria i shton forcë Organizatës së Shteteve Turkike dhe luan një rol të rëndësishëm në rritjen e bashkëpunimit ndërkulturor.
Në takim, Presidenti turk nënvizoi edhe rëndësinë e rifillimit të procesit të anëtarësimit të Turqisë në Bashkimin Evropian, duke theksuar se një afrim me Turqinë është në interes të vetë Evropës, veçanërisht në çështjet e sigurisë dhe stabilitetit.
Erdogan gjithashtu përsëriti përkushtimin e Turqisë për të ndihmuar në arritjen e një paqeje të qëndrueshme në konfliktin midis Rusisë dhe Ukrainës, duke theksuar nevojën urgjente për një armëpushim dhe rifillim të negociatave.
Erdoğan u shoqërua në këtë vizitë nga zonja e parë Emine Erdogan, drejtori i komunikimit Fahrettin Altun dhe këshilltari presidencial për politikën e jashtme dhe sigurinë, Akif Cagatay Kilic. Turqia është anëtare e plotë e OTS-së, së bashku me Azerbajxhanin, Kazakistanin, Uzbekistanin dhe Kirgistanin. Hungaria, së bashku me Turkmenistanin dhe Republikën Turke të Qipros Veriore, janë anëtare vëzhguese.
(BalkanWeb)
