Të paktën tre persona janë vrarë dhe 17 të tjerë janë plagosur në qytetin e dytë më të madh të Ukrainës, Kharkiv, pas një sulmi të madh me dron nga Rusia, ka bërë të ditur kryetari i bashkisë Ihor Terekhov.

Sipas Terekhov, gjatë natës, Rusia lëshoi 48 dronë, si dhe dy raketa dhe katër bomba rrëshqitëse. “Kemi shumë dëme,” tha ai, duke shtuar se tre ndërtesa të larta banimi janë goditur. Pamje nga vendngjarja tregojnë katet e sipërme të një ndërtese në flakë.

Vetëm një natë më parë, gjashtë persona u vranë dhe 80 u plagosën në mbarë Ukrainën, si pasojë e një sulmi tjetër masiv me mbi 400 dronë dhe gati 40 raketa. Rusia deklaroi se ky sulm ishte një kundërpërgjigje ndaj “akteve terroriste të regjimit të Kievit”, duke pretenduar se në shënjestër ishin vënë objektiva ushtarake.

Sulmet ruse ndodhën disa ditë pas një operacioni të guximshëm të Ukrainës me dronë, që synoi aeroplanë strategjikë rusë në katër baza ajrore thellë në territorin e Rusisë. Shërbimi i sigurisë së Ukrainës, SBU, bëri të ditur se gjatë operacionit “Rrjeta e Merimangës” u goditën të paktën 40 avionë rusë.

Ukraina deklaroi se kishte përdorur 117 dronë, të cilët u kontrabanduan në territorin rus dhe u fshehën në kabina druri të vendosura mbi kamionë me çati të largueshme të komanduar në distancë. Kamionët, sipas Ukrainës, u drejtuan drejt bazave ajrore nga shoferë që nuk ishin në dijeni të ngarkesës së tyre, përpara se dronët të lëshoheshin në mënyrë të kontrolluar.

Ndërkohë, presidenti amerikan Donald Trump, duke folur për gazetarët të premten në mbrëmje, tha se “ukrainasit i kanë dhënë presidentit rus Vladimir Putin një arsye për të hyrë dhe për t’i bombarduar ata brutalisht mbrëmë”.

Rusia e nisi pushtimin e plotë të Ukrainës në shkurt të vitit 2022.