Kryeministri sllovak, Robert Fico, deklaroi se Sllovakia do të kundërshtojë çdo sanksion të Bashkimit Evropian ndaj Rusisë që cenon interesat e saj kombëtare. Në një konferencë për shtyp, Fico u shpreh se do të mbetet një anëtar konstruktiv i BE-së, por nuk do të mbështesë masa që dëmtojnë vendin e tij. “Nëse ekziston një sanksion që do të na shkaktojë dëm, unë kurrë nuk do të votoj për të,” tha ai.

Rezoluta e miratuar nga parlamenti sllovak e detyron qeverinë të mos votojë për sanksione dhe kufizime të reja tregtare ndaj Rusisë, edhe pse ende nuk është e qartë se sa detyruese është kjo nga ana kushtetuese.

Nën drejtimin e Ficos, Sllovakia ka ndryshuar qëndrim ndaj Ukrainës, duke pezulluar ndihmën ushtarake shtetërore për Kievin. Ai është shprehur se sanksionet ekzistuese i shkaktojnë më shumë dëm BE-së dhe Sllovakisë sesa Rusisë, dhe ka refuzuar çdo ndalim të importeve të karburanteve ruse për centralet bërthamore sllovake.

Megjithëse Sllovakia nuk ka bllokuar ende ndonjë sanksion të BE-së, përfshirë paketën e fundit të 17-të, ajo mbetet një nga vendet që i kundërshton masat që prekin sektorët e gazit dhe energjisë bërthamore, krahas Hungarisë dhe disa vendeve të tjera që varen nga energjia ruse.