Forcat e Mbrojtjes së Izraelit (IDF) njoftuan të mërkurën se kanë vrarë kreun e një kompanie këmbimi valutor në jug të Libanit, i cili kishte një rol kyç në transferimin e fondeve nga Irani për llogari të Hezbollah-it.

Sipas ushtrisë izraelite, Haytham Abdullah Bakri, drejtues i kompanisë “Al-Sadiq Currency Exchange”, ishte një figurë qendrore në rrjetin financiar të Hezbollah-it, që ndihmonte në transferimin dhe ruajtjen e fondeve të dërguara nga Forcat Quds të Gardës Revolucionare Iraniane (IRGC).

Vrasja e Bakrit konsiderohet nga ushtria izraelite si një goditje e rëndësishme ndaj infrastrukturës financiare të këtij grupi të mbështetur nga Irani.

Ky operacion vjen një javë pasi IDF njoftoi se kishte vrarë Behnam Shahriyari, një zyrtar të lartë të IRGC-së, i cili drejtonte rrjetin financiar që transferonte qindra miliona dollarë çdo vit nga Forcat Quds tek grupet përfaqësuese të Iranit në Lindjen e Mesme.

Sipas IDF-së, këto rrjete financiare përfshinin rrugë transfertash që kalonin përmes zyrave të këmbimit në Turqi, Irak dhe Emiratet e Bashkuara Arabe, përpara se fondet të kanalizoheshin përmes pikave në Liban.

Ushtria izraelite e ka përshkruar eliminimin e këtyre figurave si një pengesë të madhe për kanalet financiare iraniane që furnizojnë Hezbollah-in.IDF bëri të ditur se këto fonde iraniane përdoreshin për blerje armësh, prodhim pajisjesh ushtarake dhe pagesën e rrogave të anëtarëve të Hezbollah-it, sipas Ynet.