Ministri i Jashtëm ukrainas Andrii Sybiha i bëri thirrje të hënën Bashkimit Evropian dhe Shteteve të Bashkuara të shtojnë presionin për sanksione ndaj Rusisë.
Sybiha, duke folur në një konferencë të përbashkët për shtyp në Kiev me homologun e tij gjerman Johann Wadephul, theksoi rëndësinë e koordinimit të ngushtë midis dy anëve të Atlantikut.
“Falënderoj partnerët tanë gjermanë për avancimin e paketës së 18-të të sanksioneve të BE-së, e cila shpresojmë se do të miratohet së shpejti”, tha Sybiha. “Këto sanksione nuk janë vetëm në mbështetje të Ukrainës – ato i shërbejnë interesave të vetë Evropës duke i prerë burimet makinës së luftës së Rusisë.”
Wadephul mbërriti në kryeqytetin ukrainas me një delegacion përfaqësuesish të industrisë gjermane të mbrojtjes.
Ai tha se kishte rënë dakord me zyrtarët ukrainas për të zgjeruar bashkëpunimin në mbrojtje, duke përfshirë nisjen e sipërmarrjeve të përbashkëta për të rritur prodhimin vendas të armëve në Ukrainë.
“Ne e shohim detyrën tonë si ndihmë për Ukrainën në mënyrë që ajo të mund të negociojë më fuqishëm”, tha Wadephul.
Ndërkohë, Këshilli Evropian të hënën zgjati sanksionet sektoriale ndaj Rusisë për gjashtë muaj të tjerë.
“Këshilli rinovoi masat kufizuese të BE-së, duke pasur parasysh veprimet e vazhdueshme të Federatës Ruse që destabilizojnë situatën në Ukrainë, për gjashtë muaj të tjerë, deri më 31 janar 2026”, tha këshilli në një deklaratë.
