Kalimi i anijeve të vogla në Kanalin Anglez është një “prioritet i përbashkët që kërkon zgjidhje të përbashkëta”. Kështu ranë dakord Emmanuel Macron dhe Sir Keir Starmer përpara një samiti midis Francës dhe Britanisë.
Kryeministri dhe presidenti i Francës këmbëngulën që të dy vendet e tyre “duhet të shkojnë më tej” për të ndaluar valën e anijeve që bëjnë udhëtimin, tha Doëning Street pasi udhëheqësit zhvilluan një takim kokë më kokë.
Mbretëria e Bashkuar ka kërkuar veprime më të ashpra nga autoritetet franceze në plazhet përgjatë bregdetit të Kanalit Anglez, ndërsa Macron ka sugjeruar që Britania duhet të bëjë përpjekje për të zvogëluar “faktorët tërheqës” për emigrantët.
Kryeministri e mirëpriti presidentin francez në Doëning Street të mërkurën përpara një samiti të plotë Britani-Francë të enjten, ku do të marrin pjesë ekipe ministrore nga të dy vendet.
“Udhëheqësit ranë dakord që trajtimi i kërcënimit të migracionit të parregullt dhe kalimeve me anije të vogla është një përparësi e përbashkët që kërkon zgjidhje të përbashkëta”, tha një zëdhënës i Doëning Street pas takimit.
Më tej zëdhënësi britanik shtoi: “Kryeministri foli për ashpërsimin e sistemit nga Qeveria e tij vitin e kaluar për të siguruar që rregullat të respektohen dhe të zbatohen, duke përfshirë një rritje masive të arrestimeve të paligjshme për punë për t’i dhënë fund premtimeve të rreme të vendeve të punës që përdoren për të shitur hapësira në anije. Të dy udhëheqësit ranë dakord mbi nevojën për të shkuar më tej dhe për të bërë përparim në zgjidhje të reja dhe inovative, duke përfshirë një pengesë të re për të thyer modelin e biznesit të këtyre bandave.”
(BalkanWeb)
