Disa persona kanë mbetur të plagosur pas një serie të shtënash me armë zjarri në shtetin amerikan të Kentucky-t, mëngjesin e së dielës.

Guvernatori i Kentucky-t, Andy Beshear, konfirmoi incidentet, të cilat ndodhën në qytetin Lexington dhe përfshinë një të dyshuar që tashmë është ndaluar nga autoritetet.

Sipas raportimeve paraprake, një oficer i policisë shtetërore u qëllua në aeroportin Blue Grass në Qarkun Fayette, ndërsa pak më vonë ndodhën të shtëna të tjera në Kishën Baptiste në Rrugën Richmond. Guvernatori deklaroi se incidenti në kishë shkaktoi plagosje të shumta. “Polici dhe të tjerët e plagosur po marrin trajtim në një spital lokal,” tha ai.

Forcat e rendit nga Policia Shtetërore dhe Departamenti i Policisë së Lexington-it ndërhynë me shpejtësi dhe arrestuan të dyshuarin brenda ambienteve të kishës. Hetimet për rrethanat dhe motivet e sulmit janë ende në vijim.