Ushtria izraelite ka goditur për të tretën ditë radhazi objektiva të qeverisë siriane, përfshirë Ministrinë e Mbrojtjes në Damask dhe forca të armatosura në jug të vendit, ndërsa përleshjet sektare në provincën me shumicë druze të Suweidës vazhdojnë me dhunë të madhe.

Kryeministri i Izraelit, Benjamin Netanyahu, deklaroi se Izraeli po vepron për të “shpëtuar vëllezërit tanë druze”, ndërsa presidenti i përkohshëm sirian, Ahmed al-Sharaa, e akuzoi Izraelin për një “përshkallëzim në shkallë të gjerë”.

Që nga e diela, mbi 350 persona raportohet të kenë humbur jetën pas shpërthimit të përplasjeve mes milicive druze dhe fiseve beduine në Suweida. Të mërkurën vonë, ushtria siriane nisi tërheqjen nga zona, pas një marrëveshjeje të ndërmjetësuar me ndihmën e SHBA-së dhe palëve arabe.

Sekretari amerikan i Shtetit, Marco Rubio, shkroi në platformën X: “Kemi rënë dakord për hapa konkretë që do t’i japin fund kësaj situate shqetësuese dhe tmerruese sonte.”

Agjencia shtetërore siriane, Sana, raportoi se largimi i trupave u realizua pas përfundimit të operacioneve kundër “grupeve jashtëligjore” dhe në koordinim me liderët fetarë druzë. Ministria e Jashtme e Sirisë deklaroi se mirëpret përpjekjet e SHBA-së dhe vendeve arabe për një zgjidhje paqësore të krizës.

Izraeli ka refuzuar të komentojë mbi përpjekjet për armëpushim, por vazhdoi goditjet ajrore, përfshirë një sulm në Sheshin Umayyad në Damask, pranë Ministrisë së Mbrojtjes, dhe një tjetër pranë pallatit presidencial, duke dhënë një sinjal të qartë ndaj Sharaa-s.

Ministri izraelit i Mbrojtjes, Israel Katz, shkroi në X se “goditjet e dhimbshme kanë filluar” dhe shtoi se ushtria do të vazhdojë operacionet në Suweida “derisa forcat që sulmuan druzët të tërhiqen plotësisht”.

Sipas ushtrisë izraelite, janë shkatërruar automjete të blinduara me armë të rënda dhe depo armësh në jug të Sirisë.