Numri i të vdekurve nga përleshjet në qytetin jugor sirian të Suweidës është rritur në 400.
Luftimet midis mbështetësve të udhëheqësit Druzë, Sheikh Hikmat al-Hijri, forcave qeveritare dhe fiseve beduine kanë shpërthyer që nga e diela, së bashku me sulmet ajrore të kryera nga Izraeli, i cili pretendoi se ishte në mbështetje të Druzëve.
Omar Obeid, një mjek në spitalin qeveritar në qytetin kryesisht druz të Suweidës, tha për AFP se objekti mjekësor kishte marrë “më shumë se 400 trupa që nga mëngjesi i së hënës”, përfshirë ato të grave dhe fëmijëve.
“Nuk ka më vend në morg, trupat janë në rrugë” përpara spitalit, shtoi Obeid, president i degës Suweida të Urdhrit të Mjekëve.
Ndërkohë, Rrjeti Sirian për të Drejtat e Njeriut (SNHR) tha se kishte dokumentuar vrasjen e të paktën 321 sirianëve, përfshirë 6 fëmijë dhe 9 gra, dhe plagosjen e më shumë se 436 të tjerëve.
Numri fillestar i viktimave përfshin viktima civile – përfshirë fëmijë, gra dhe personel mjekësor – si dhe luftëtarë nga grupet fisnore të armatosura beduine dhe banorë vendas jashtë kontrollit të shtetit, si dhe anëtarë të forcave ushtarake dhe të sigurisë të qeverisë siriane, tha ai.
SNHR theksoi se numri i të vdekurve është paraprak, me përpjekje që ende po zhvillohen për të identifikuar viktimat dhe ata që janë përgjegjës për vrasjen e tyre.
Vlerësime të tjera e kanë çuar numrin e të vdekurve në 600.
Trazirat në Suweida kanë nënvizuar sfidat e sigurisë me të cilat përballet qeveria e re e Sirisë, me tensione ndërkomunitare dhe sulme nga Izraeli që kërcënojnë stabilitetin e vendit.
Ministri sirian i Emergjencave dhe Menaxhimit të Fatkeqësive, Raed Al-Saleh, njoftoi të premten se kishte formuar një dhomë të përbashkët operacionesh për t’u marrë me situatën humanitare që rezultoi nga përleshjet.
Në një deklaratë video herët të enjten, udhëheqësi sirian Ahmed al-Sharaa tha se mbrojtja e të drejtave të druzëve ishte ndër prioritetet e tij dhe fajësoi “grupet e jashtëligjshme” që kërkojnë të nxisin tensionet për çdo krim kundër civilëve.
Ai u zotua të mbajë përgjegjës personat për shkeljet kundër druzëve, por nuk tha nëse forcat qeveritare ishin përgjegjëse.
(A.A/BalkanWeb)
