Gjyqi i ri në Argjentinë për vdekjen e Diego Maradonës, pasi procedurat e para u anuluan në maj, nuk pritet të fillojë para vitit 2026, sipas pjesëmarrësve në një seancë dëgjimore përgatitore midis prokurorisë, avokatëve dhe gjyqtarëve të sapoemëruar.
“Ne të gjithë jemi dakord të rifillojmë sa më shpejt të jetë e mundur, por personalisht e shoh shumë të vështirë të fillojmë gjyqin para vitit të ardhshëm”, tha për AFP të premten Martin Montalto, avokati i njërit prej të pandehurve – infermieres koordinuese – pas një seance të shkurtër dëgjimore në San Isidro (në veri të Buenos Aires) për të përcaktuar kuadrin procedural të gjyqit të ardhshëm.
Gjyqi i parë u shpall i pavlefshëm në fund të majit, pas dy muajsh e gjysmë seancash dëgjimore, me më shumë se 40 dëshmitarë të marrë në pyetje. Arsyeja ishte skandali që çoi në përjashtimin e njërës prej tre gjyqtareve, sepse ajo kishte marrë pjesë në përgatitjen e një dokumentari rreth gjyqit, me veten në rolin e “protagonistes”.
Gjyqtarja, Julieta Macindatch, që atëherë ka paraqitur dorëheqjen e saj dhe është gjithashtu subjekt i ndjekjeve penale për sjelljen e saj.
Në fund të qershorit, Departamenti i Drejtësisë emëroi tre gjyqtarë të rinj me short, përpara se njëri të tërhiqej duke përmendur arsye shëndetësore. Një zëvendësues u emërua këtë javë, duke lejuar që përgatitjet për fillimin e gjyqit.
Burime të tjera të njohura me rastin shprehën rezerva nëse një gjyq i dytë është i mundur deri në fund të vitit 2025. Një avokat i Veronica Ojeda-s, ish-partneres së yllit të futbollit, shpresonte ende për një gjyq “së shpejti”, para fundit të vitit.
Në praktikë, palët kanë 10 ditë për të kërkuar skualifikimin e një ose më shumë gjyqtarëve sapo të finalizohet treshja. Palëve iu dha ky afat të premten, përpara një seance të mëtejshme paraprake dëgjimore, me shumë mundësi në fillim të gushtit. Rasti i njërit prej të pandehurve, mjekut personal të Maradonës, Leopoldo Luque, i cili që atëherë ka kërkuar një gjyq të veçantë nga një juri porotë, mbetet gjithashtu për t’u shqyrtuar.
Shtatë profesionistë shëndetësorë – mjekë, një psikiatër, një psikolog, infermierë – duhet të përgjigjen për “vrasje të paqëllimshme me qëllim të mundshëm “, domethënë për neglizhencë të kryer me dijeninë se mund të çojë në vdekje. Ata përballen me dënime me burg nga 8 deri në 25 vjet.
Maradona, një yll i madh i futbollit botëror, vdiq në moshën 60 vjeç më 25 nëntor 2020 nga arresti kardiorespirator dhe edema pulmonare, pas orësh agonie sipas aktakuzës, në një rezidencë në Tigre, në veri të Buenos Aires, ku po shërohej nga neurokirurgjia.
