Presidenti i SHBA-së, Donald Trump, tha sot në një postim në Truth Social se do të ndihmonte afganët që janë mbajtur për vite me radhë në Emiratet e Bashkuara Arabe, pasi u larguan nga vendi i tyre kur talebanët rimorën kontrollin e tij në vitin 2021.
Presidenti i SHBA-së, i cili ka premtuar të marrë masa të ashpra kundër imigracionit të paligjshëm , pezulloi programin e refugjatëve me të hyrë në Shtëpinë e Bardhë janarin e kaluar.
Në prill, administrata Trump i dha fund programit të mbrojtjes nga deportimi për mijëra afganë në Shtetet e Bashkuara .
“Do të përpiqem t’i shpëtoj ata, duke filluar që tani”, tha Trump në një postim në Truth Social, duke cituar një raport në lidhje me refugjatët afganë.
Sipas Just the News, zyrtarët e Emirateve të Bashkuara Arabe po përgatiteshin t’ua dorëzonin disa refugjatë afganë talebanëve .
Emiratet e Bashkuara Arabe janë një aleat i ngushtë i sigurisë i SHBA-së dhe ranë dakord në vitin 2021 të strehonin përkohësisht mijëra afganë që ikën nga Kabuli kur talebanët përmbysën qeverinë e mbështetur nga Uashingtoni gjatë fazës së fundit të tërheqjes së SHBA-së nga vendi.
Rreth 200,000 afganë janë sjellë në Shtetet e Bashkuara nga administrata e ish-Presidentit Joe Biden pas tërheqjes kaotike të trupave amerikane nga Kabuli.
Demokratët i kanë kërkuar Trumpit të rivendosë programin që ofron mbrojtje të përkohshme për afganët, duke thënë se gratë dhe fëmijët në veçanti mund të vuajnë shumë nën sundimin e talebanëve.
Refugjatët përfshijnë të afërm të ushtarëve afgano-amerikanë, fëmijë që kanë marrë lejen për t’u ribashkuar me prindërit e tyre, të afërm të afganëve që tashmë janë pranuar në Shtetet e Bashkuara dhe dhjetëra mijëra të tjerë që kanë punuar me qeverinë amerikane gjatë luftës 20-vjeçare në vendin e tyre.
(A.A/BalkanWeb)
