Presidenti i SHBA-së, Donald Trump, tha të martën se bisedimet e fundit tregtare midis përfaqësuesve të SHBA-së dhe Kinës ishin pozitive, duke shtuar se pret të takohet me homologun e tij kinez, Xi Jinping, diku këtë vit.

Duke iu referuar dy ditëve të fundit të bisedimeve të Sekretarit të Thesarit të SHBA-së, Scott Bessent, në Suedi me zëvendëskryeministrin kinez He Lifeng, Trump u tha gazetarëve në Air Force One se Bessent “pati një takim shumë të mirë me Kinën”.

“Ata do të më informojnë nesër. Ose do ta miratojmë ose jo”, tha ai, duke shtuar se Bessent “u ndie shumë mirë për takimin, më mirë se dje”.

Trump konfirmoi gjithashtu qëllimin e tij për t’u takuar me Xi në të ardhmen e afërt, duke thënë se presidenti kinez “dëshiron të takohet”.

“Dhe mezi pres takimin gjithashtu, por do të thoja para fundit të vitit”, tha Trump, duke u kthyer në SHBA nga një vizitë në Skoci.

 

(A.A/BalkanWeb)