Presidenti i SHBA-së Donald Trump dhe presidenti rus Vladimir Putin zhvillojnë sot takimin e tyre historik në Alaska, të lajmëruar disa javë më parë, me fokus përfundimin e luftës në Ukrainë.

Shtëpia e Bardhë ka konfirmuar oraret kryesore të Presidentit Trump ku sipas agjendës mësohet se bisedimet pritet të zgjasin shtatë orë.

Takimi në Anchorage të Alaskës, midis Presidentit të SHBA-së Donald Trump dhe Presidentit rus Vladimir Putin do të zhvillohet sot në orën 11:00 të mëngjesit sipas orës lokale (ora 21:00 GMT), njoftoi Shtëpia e Bardhë në një njoftim për shtyp, siç raportohet nga Reuters në faqen e saj të internetit.

Trump do të largohet nga Shtëpia e Bardhë në orën 6:45 të mëngjesit të premten (ora 12:45 GMT) dhe do të largohet nga Anchorage në orën 5:45 të pasdites të njëjtën ditë (ora e Alaskës, ora 3:00 GMT).

Kthimi i tij në Shtëpinë e Bardhë është planifikuar për të shtunën herët në mëngjes.

Dje, Kremlini tha se takimi do të fillonte në orën 11:30 të paradites sipas kohës lokale (ora 21:30 në Itali).

Presidenti i SHBA-së Donald Trump la të kuptohej dje se udhëheqësit evropianë mund të ftohen në një takim të mundshëm të dytë me presidentin rus, Vladimir Putin, në të cilin ai tha se duhet të marrë pjesë edhe presidenti ukrainas, Volodymyr Zelensky.

“Do të kemi një takim me presidentin Putin, presidentin Zelensky, mua, dhe ndoshta do të sjellim disa nga udhëheqësit evropianë me vete. Ndoshta jo”, tha Trump në Shtëpinë e Bardhë.

Fokusi i takimit të së premtes do të jetë lufta e Rusisë kundër Ukrainës, e cila ka vazhduar që nga shkurti i vitit 2022, kur Rusia nisi një sulm në shkallë të plotë kundër fqinjit të saj.

Gjatë fushatës së tij zgjedhore, Trump pretendoi se do ta përfundonte luftën shpejt.

Ai deklaroi se beson që Putini dhe Zelensky do të bënin paqe.

Kur u pyet nëse do të binte dakord për një reduktim të trupave të NATO-s në Evropë për t’iu përshtatur Rusisë, Trump tha se një propozim i tillë nuk i ishte paraqitur ende.

(BalkanWeb)

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb