Presidenti venezuelian Nicolas Maduro tha të premten, gjatë një eventi për të “mbrojtur sovranitetin dhe paqen kombëtare”, se vendosja e trupave e njoftuar nga qeveria amerikane në Karaibe është pjesë e një plani që është “imoral, kriminal dhe i paligjshëm”.
“Ajo që ata po kërcënojnë të përpiqen të bëjnë kundër Venezuelës, ndryshimi i regjimit, një sulm ushtarak terrorist, është imorale, kriminale dhe e paligjshme”, tha Maduro para parlamentit të vendit latino-amerikan.
“Është një çështje që ka të bëjë me paqen, të drejtën ndërkombëtare, në Amerikën Latine dhe Karaibe. Kur dikush sulmon një vend në Amerikën Latine, sulmon të gjithë të tjerët, kur kërcënon një vend, kërcënon të gjithë të tjerët”, shtoi ai.
Administrata e Presidentit të SHBA-së, Donald Trump, njoftoi disa ditë më parë një operacion kundër “trafikut të drogës” në Karaibe, me pjesëmarrjen e elementëve detarë, ajrorë dhe tokësorë . Sipas burimeve në qeverinë dhe median amerikane, tre anije zbarkimi me helikopterë, tre shkatërrues të pajisur me raketa dhe sistemin Aegis, të paktën një nëndetëse dhe burime të tjera do të vendosen pranë Venezuelës, si dhe deri në 4,000 marinarë.
Pardje, presidenti thirri gardën kombëtare, rezervistët dhe “të gjithë popullin” për t’u mobilizuar gjatë fundjavës për t’u përballur me “kërcënimet” e Shteteve të Bashkuara. Më herët këtë javë, zoti Maduro kishte thënë tashmë se po aktivizonte një plan të posaçëm që parashikon vendosjen e 4.5 milionë gardës kombëtare në “të gjithë” territorin e Venezuelës.
Uashingtoni nuk i njeh rezultatet e dy zgjedhjeve të fundit presidenciale në Venezuelë, në të cilat zoti Maduro u rizgjodh. Ai e akuzon atë si kreun e asaj që e quan Cártel de los Soles (“karteli i diejve”), një organizatë kriminale në të cilën implikon edhe zyrtarë nga qeveria e tij dhe forcat e armatosura të Venezuelës. Karakasi kundërshton duke thënë se nuk ekziston një organizatë e tillë.
(BalkanWeb)
