Në Durrës është gjetur një sasi tritoli pranë një hoteli jashtë funksionit, i cili është në pronësi të ish-kreut të Bashkisë, Vangjush Dako.

Lënda shpërthyese ishte lidhur me një telefon celular, ndërsa policia ka kërkuar ndihmën e forcave xheniere nga Tirana për të kryer një shpërthim të kontrolluar.

Zona rreth hotelit është bllokuar dhe është evakuuar për sigurinë e banorëve dhe turistëve. Lagjja 1, ku ndodhet hoteli, është një nga zonat më të vjetra dhe më të frekuentuara të Durrësit.

Klodiana Haxhiaj: Tritoli ishte lidhur me celular. Policia ka gjetur lëndë eksplozive, e lidhur me telefon. Është kërkuar ndihma e forcave xheniere nga Tirana që të bëjë shpërthim të kontrolluar dhe ata do bëjnë shpërthimin e kontrolluar. Policia ka rrethuar zonën, ka bërë largimin e njerëzve. Zona është bllokuar.

Aty pranë ku është vendosur tritoli është një hotel jashtë aktivitetit, që është blerë nga ish kreu i Bashkisë Durrës, Vangjush Dako. Hoteli është i pabanuar dhe nuk ka njerëz apo turistë aty. Lagjja 1 në Durrës është ndër më të vjetrat e qytetit bregdetar, e mbushur me qytetarë dhe turistë.

SPAK ka hetuar Vangjush Dakon për keqpërdorim të kompetencave si kryetar bashkie, pasi ai dhe stafi i tij miratuan lejen e ndërtimit për shoqërinë Fakle sh.p.k dy vjet pas përfundimit të ndërtimit dhe banimit në objekt.

Hetimi zbuloi se objekti shumëkatësh ishte ndërtuar pa leje dhe nuk përputhej me projektin e miratuar nga bashkia. Gjithashtu, Dako akuzohet për një procedurë prokurimi të parregullt për një projekt të Promenadës Bregdetare, ku fondi limit u llogarit gabim nga komisioni i tij, duke e tejkaluar shumë herë shumën e lejuar nga Këshilli i Ministrave.