Presidenti bjellorus Alexander Lukashenko tha pas takimit me Vladimir Putin se udhëheqësi rus ishte gati të shpallte një “propozim shumë të mirë” për t’i dhënë fund luftës në Ukrainë, i cili mbështetet gjerësisht nga Shtetet e Bashkuara.

Lukashenko, i cili pati një bisedë pesë-orëshe me Putinin më parë në Moskë, nuk zbuloi se çfarë përfshinte propozimi, por presidenti rus ia paraqiti atë homologut të tij amerikan Donald Trump në një samit në Alaska muajin e kaluar.

“Unë dhe Presidenti Putin e diskutuam, por unë nuk do të flas për të. Presidenti vetë do të flasë “, tha presidenti bjellorus, një aleat i ngushtë i Moskës.

” Është një propozim i mirë për Ukrainën, propozime që Donald Trump i dëgjoi në Alaska, ndër të tjera, dhe shkoi në Uashington për t’i diskutuar. “Një propozim shumë i mirë “, ia përsëriti ai gazetarit rus Pavel Zarubin.

“Nëse ukrainasit nuk i pranojnë këto propozime, (situata) do të jetë siç ishte në fillim të operacionit ushtarak special”. “Do të jetë edhe më keq: ata do ta humbasin Ukrainën “, paralajmëroi ai, duke përdorur termin që Moska përdor për pushtimin.

Rusia deri më tani ka këmbëngulur në kushte që Kievi i refuzon pasi Ukraina i sheh ato si të barasvlershme me dorëzimin. Këto përfshijnë lëshimin e më shumë territorit, braktisjen e ambicionit të saj për t’u bashkuar me NATO-n dhe vendosjen e kufizimeve në madhësinë e forcave të saj të armatosura.

Të martën, në një kthesë të papritur, Trump tha se Ukraina është e aftë të rimarrë të gjithë territorin e saj (rreth një e pesta e vendit kontrollohet nga Rusia) dhe duhet të veprojë tani sepse ekonomia ruse po përballet me probleme serioze. Kremlini e hodhi poshtë këtë vlerësim, duke ia atribuar faktit se Trump sapo ishte takuar me Presidentin ukrainas Volodymyr Zelensky dhe ishte i ndikuar nga perceptimi i tij për luftën. Zelensky, nga ana e tij, thotë se Putini po pretendon të negociojë, por nuk është realisht i interesuar për paqen.

“Për të mos humbur të gjithë Ukrainën, (Zelensky) do të duhet jo vetëm të negociojë, por edhe të bjerë dakord për kushte të favorshme – kushte të miratuara nga amerikanët “, tha Lukashenko. Ai gjithashtu sugjeroi që ai, Putini dhe Zelensky, si udhëheqës të tre shteteve sllave, duhet të diskutojnë dhe të arrijnë një marrëveshje.

Ukraina thotë se dëshiron një takim midis Zelensky-t dhe Putinit, por Rusia thotë se kjo mund të ndodhë vetëm nëse udhëheqësi ukrainas pranon të shkojë në Moskë. Lukashenko takohet me Putinin më shpesh se çdo udhëheqës tjetër i huaj dhe ka mbështetur luftën e Rusisë në Ukrainë, por nuk ka dërguar trupa të vetat.

Ai ka qenë subjekt i sanksioneve perëndimore për vite me radhë për shkak të rolit të tij në luftë dhe të të drejtave të njeriut në vendin e tij. Por Trump kohët e fundit e telefonoi, e lavdëroi dhe dërgoi një të dërguar në Minsk për bisedime që çuan në lirimin e më shumë se 50 të burgosurve politikë.