Autoritetet palestineze në Rripin e Gazës vazhdojnë kërkimet për gjetjen e trupave të robërve izraelitë nën rrënojat që la pas ushtria izraelite pas dy vitesh lufte. Kërkimet janë të përqendruara në jugun e Gazës, me mjete të kufizuara dhe praninë e grupeve të armatosura të sigurisë.

Më saktësisht, në Khan Yunis në jug të Rripit të Gazës, tre buldozerë po punojnë mes grumbujve të rrënojave, duke kërkuar trupat e robërve izraelitë që sipas Hamasit, u vranë nga sulmet izraelite ndërsa mbaheshin në ambiente nëntokësore.

Fraksionet e armatosura që veprojnë në zonë kanë marrë përsipër mbrojtjen e vendit, ndërsa grupet e shpëtimit përpiqen të afrohen në vendet ku besohet se janë eshtrat.
Operacionet janë të vështira dhe të ngadalta, pasi mungesa e mjeteve teknologjike kufizon përpjekjet për gërmim.

Grupet mbështeten kryesisht në makineri të rënda për të larguar rrënojat, pa pasur pajisje të specializuara ose sisteme kërkimi.
Krahu ushtarak i Hamasit, Brigadat Al-Qassam, njoftoi të mërkurën se po bën përpjekje për të “mbyllur çështjen” e robërve izraelitë, duke theksuar se nevojitet pajisje speciale dhe mjete teknologjike për të gjetur dhe nxjerrë trupat nga rrënojat.

Që nga e hëna, Hamas ka liruar 20 robër izraelitë të gjallë dhe ka dorëzuar 10 trupa, nga gjithsej 28 që përfshihen në marrëveshjen e shkëmbimit me Izraelin.

Sipas Tel Avivit, megjithatë, një nga dhjetë trupat e dorëzuar nuk përkon me asnjë nga të zhdukurit e regjistruar, duke ngritur numrin total të të vdekurve të konfirmuar në 19.
Marrëveshja, e arritur javën e kaluar bazuar në planin e presidentit amerikan Donald Trump, parashikon në fazën e parë lirimin e robërve izraelitë në këmbim të lirimit të palestinezëve të burgosur.

Plani përfshin gjithashtu rindërtimin gradual të Gazës dhe krijimin e një mekanizmi të ri administrativ pa përfshirjen e Hamasit.
Që nga tetori i vitit 2023, nga operacionet izraelite kanë vdekur 68,000 palestinezë, shumica prej tyre gra dhe fëmijë, duke kthyer Gazën në një zonë thuajse të pabanuar.