Edhe pse zyrtarisht është e pandehur e SPAK për aferën e tunelit të Llogarasë ndërsa janë zbuluar edhe detaje tronditëse nga dosja hetimore, ku përfshihen komunikimet skandaloze me ish vartësin e saj Evis Berberi, Belinda Balluku vijon të mbajë detyrën e zv/kryeministres dhe ministres së Infrastrukturës e Energjetikës.

Sot, Balluku mori pjesë në një inspektim publik, ndërsa refuzoi të shkojë në sallën e Kuvendit, ku u kërkua nga opozita edhe një interpelancë por që mazhoranca e rrëzoi.

Pas daljes së Ballukut, eksperti i ekonomisë, Zef Preçi ka reaguar ashpër, duke e konsideruar atë “fyese dhe poshtëruese për qytetarët, votuesit dhe taksapaguesit”.

Në një postim në rrjetet sociale, Preçi thekson se beson në prezumimin e pafajësisë për çdo qytetar dhe zyrtar të hetuar për korrupsion apo abuzim me detyrën shtetërore, por shton se personat e përfshirë në afera të tilla duhet “të përballen me drejtësinë përpara se të vazhdojnë propagandën mediatike”.

Sipas tij, heshtja e qytetarëve apo opozitës përballë rasteve të tilla nuk duhet interpretuar si mungesë interesi për fatet e vendit.

“Të mos harrojmë se më shumë se gjysma e familjeve shqiptare mezi mbyllin muajin për shkak të varfërisë që njeh vetëm rritje. Gjatë dekadës së fundit kanë lënë vendin mbi 500 mijë shqiptarë, dhe ajo zonjë e bashkëqeverisësit e saj janë përgjegjësit kryesorë për këtë katastrofë kombëtare”, – shkruan Preçi.

Në përfundim, ai bën thirrje për zgjim qytetar dhe përgjegjësi individuale e institucionale, duke theksuar se kjo është e vetmja mënyrë për të rikthyer besimin e publikut te drejtësia dhe institucionet.

Postimi i plotë
SFIDE E HAPUR NDAJ OPINIONIT PUBLIK…