Një aktivitet në Zyrën Ovale të Shtëpisë së Bardhë u ndërpre papritur të enjten, pasi një i ftuar u rrëzua pas Presidentit Donald Trump, duke shkaktuar shqetësim mes të pranishmëve.

Burri ndodhej në eventin ku presidenti po njoftonte planin e tij për uljen e kostos së ilaçeve për humbje peshe, kur i ra të fikët dhe u kap nga dy persona pranë tij përpara se të binte në dysheme.

Presidenti Trump ishte ulur përballë tij në tryezën Resolute, ndërsa Dr. Mehmet Oz, administrator i Qendrave për Shërbimet Medicare dhe Medicaid, nxitoi për ta ndihmuar.

Gazetarët dhe fotografët që mbulonin ngjarjen u nxorën menjëherë nga dhoma, ndërsa personeli mjekësor i Shtëpisë së Bardhë ndërhyri për të dhënë ndihmën e parë.

Sekretarja e shtypit e Shtëpisë së Bardhë, Karoline Leavitt, tha në një deklaratë se burri “përfaqësonte një nga kompanitë e përfshira në marrëveshje” dhe se “Njësia Mjekësore e Shtëpisë së Bardhë hyri shpejt në veprim dhe zotëria është mirë.”

Më vonë, David Ricks, kryetar dhe drejtor ekzekutiv i kompanisë farmaceutike Eli Lilly, konfirmoi se personi që i ra të fikët ishte një përfaqësues i kompanisë dhe se tani është shumë mirë.