Sekretari i Përgjithshëm i Kombeve të Bashkuara, Antonio Guterres, e quajti të martën miratimin e një rezolute të mbështetur nga SHBA-të për Gazën një hap të rëndësishëm në konsolidimin e armëpushimit, në një deklaratë dërguar gazetarëve.

Këshilli i Sigurimit i OKB-së votoi të hënën për të miratuar një rezolutë të hartuar nga SHBA-të, e cila mbështet planin e Presidentit Donald Trump për t’i dhënë fund luftës në Gaza dhe autorizon një forcë ndërkombëtare stabilizimi atje.

“Tani është thelbësore që momentumi diplomatik të përkthehet në hapa konkretë dhe urgjentisht të nevojshëm në terren”, tha Guterres në deklaratë, duke shtuar se OKB-ja është e përkushtuar për të rritur ndihmën humanitare në Gaza.

Guterres tha gjithashtu se ishte e rëndësishme të vazhdohej përparimi drejt fazës së dytë të planit amerikan, që çon në një proces politik për të arritur një zgjidhje me dy shtete midis Izraelit dhe palestinezëve.

Agjencitë e OKB-së janë ankuar se, më shumë se një muaj pas armëpushimit , ato ende nuk mund të sjellin ndihmë të mjaftueshme në Gaza për të përmbushur nevojat e miliona njerëzve të zhvendosur dhe të traumatizuar nga lufta dyvjeçare.

“Po arrijmë të sigurojmë më shumë, por nuk është e mjaftueshme”, tha Ricardo Pires , zëdhënës i agjencisë së OKB-së për fëmijët, në një konferencë për shtyp në Gjenevë të martën.